Ilimmarfiaraq nutaamik aqutsisortaarpoq
Johanne Olsen Ludvigsen ukiuni 23-ini ilinniartitsisutut sulereerluni maanna Ilimmarfiaqqami aqutsisunngorpoq. Tamannalu sioqqullugu Sisisimiuni piareersarfimmi ilinniartitsisutut sumiiffimmilu aqutsisutut atorfeqareersimavoq.
-Ukiuni arlalinni atuarfimmi ”naliginnaasumi” sulereerlunga maanna atuarfimmi namminersortumi sulilerpunga. Atuarfiup namminersortup isumaa nuannareqaara, atuartummi ataasiakkaat atuartinneri ineriartornerilu malinnaaffigilluarlugit atuartitseriaaseqartoqarpoq. Johanne Olsen Ludvigsen taama oqarpoq.
Ilimmarfiaqqami atuartitseriaaseq ataatsimoorussamik ingerlariaaseqarpoq. Tassalu atuartut suliaqarusssuseqarnerminni peqataalluarlutik ataatsimut annerusunik suliaqaqatigiinnerminni ilikkagaqarluartarput.
-Sammisamik toqqaasarpugut, sammisarlu aallaavigalugu faagit assigiinngitsut atorlugit sammisaq eqqartuiffigisarlutigu. Soorlu sammisaq Matimatikkimiit oqaatsinut tunngasunngorlugu eqqartuiffigalugu suliaqarsinnaasarluta. Taamaallillutillu atuartut takunnissinnaalersarput suna ilinniarnerlugu, taamalu siunissami qanoq atorsinnaanerlugu takusinnaanngortarlugu. Atuartuutigullu aaliangersimaqqissaartunik suliakkerneqarneq ajorput, soorlu Matimatikkimi atuakkami qupperneq 53-mi suliassat sisamat aqagumut naammassisimassapput. Tamanna maani atuarfimmi ilinniartitsissutitut atorneq ajorparput, isumaqarpungalu maani atuartiseriaaserput ajunngilluinnartoq, tamannalu siunissami atuartuutigisatta nunarsuup ilaani ilinniaqqinnissaminnut iluaqutigilluarumaaraat, Johanne Olsen Ludvigsen oqaluttuarpoq.
