Ilimasuutaat assigiinngillat

Arlaannaannulluunniit attuumassuteqanngitsunik misissuisoqarnissaanik piumasaqarnissamik kissaatertik Naalakkersuisunit tusaaneqarsimasoq ullumi paasereerlugu, Nunanut Allanut Sillimaniarnermullu Ataatsimiititaliami ilaasortat piumasaqaatip tusaaneqarnissaanik assigiinngitsunik ilimasuuteqarput.

- Soorunami piviusorsiortumik isigisariaqarpara. siusinnerusukkut naaggaareerput, maannalu aamma soorunami naaggaaqqinnissaat naatsorsuutigaara, Justus Hansen oqarpoq.

Tassalu Nunanut Allanut Sillimaniarnermullu Ataatsimiititaliap siulittaasua neriuuteqanngilaq, Naalakkersuisut ulluni qaninnerni piumasariumaagaannut, danskit naalakkersuisui nakkaannassasut. Ilaasortarli alla allarluinnarmik natsorsuuteqarpoq.

- Qallunaat naalagaaffiata nunatta naalagaaffeqatigiinnerup iluaniinnera ataqqillugu pisussaaffigaat, Nunatta kissaataa malillugu aamma sulissalluni. Isumaqarpungalu suliassamik taama itumik tigusineq pisussissamisuuginnassasoq, Siumut siulittasua Aleqa Hammond oqarpoq.

Misissuinissamillu piumasaqaammut danskit naalakkersuisui piumasaqaammik akuersaassappata, paasissutissanik nutaarluinnarnik saqqummertoqassasoq, ataatsimiititaliap siulittaasuata Justus Hansenip ilimagilluinnarpaa.

- Taamaassorara, tassami sooq misissuisoqarnissaa aallaqqaataaniilli kissaatigineqanngitsoq paasisinnaanngilara. Arlaannik toqqorterisoqarpoq. Taamaanngikkaluarpammi oqarsimassagaluarput, ajunngilaq misissuisitsiniarta, Justus Hansen oqarpoq.

Taassumami ilimagaa, Amerikamiut tigusanik angallassinerminnut atatillugu nunatta silaannaanik mittarfiinillu atuinissaannik, danskit naalakkersuisui akuersaarsimassasut.

- Aap, soorlu taamaappasittoq, Justus Hansen oqarpoq. taassuma erseqqissarpaa, ataatsimiititaliap siulittaasuatut oqalunnginnami, kisianni inuttut nammineq Demokraatillu sinnerlugit oqalulluni.

Aleqa Hammondilli oqaatigiumanngilaa, danskit naalakkersuisut pasillernerlugit. Arlariillutilli isumaqatigiilluinnarput, naatsorsuutigigamikku, danskit misissueqqusineq akuersaaraluarpassuk, arlaannik saqqummertoqarumaartoq.

- Nunatta qanoq atorneqarnissaanut danskit naalakkersuisut pisussaaffiliisimanersut pisussaaffigiliisimannginnersulluunnit, ulloq manna tikillugu erseqqissumik akineqarsimanngitsoq, akissutissarsissavarput, Aleqa Hammond oqarpoq.