Ilimanaq sanaartorfiunialeqaaq

Ilimanaq 60-it missaannik inulik Nunatsinnilu inoqarfiit pisoqaanersaasa ilaat, Ilulissallu tunngavilerneqarnerata nalaani aamma tunngavilerneqartoq, ukioq mannamiit 2015-imi upernaap tungaanut sanaartorfiungaatsiartussanngorpoq.
marsip 01-at 2013 06:21

Qallunaat aningaasaateqarfiat, Realdania Byg, Qaasuitsup Kommunia aamma takornarialerinermik suliaqartoq, World of Greenland, suleqatigiinnissamut isumaqatigiissuteqarsimapput Ilimanami illorsuit pisoqqat marluk iluarsaanneqarnissaannut kiisalu illuaqqanik unnuisarfinnik 15-inik sanaartornermik malitseqartussamik.

- Illorsuit pisoqqat marluk alutornartut iluarsaatissavagut, tassa Ilimanami niuertup illorsua pisiniarfitoqarlu. Taakkua 1700-kkut qiteqqunneranneersuupput, Frands Frandsen, Realdania Byg-imi illussanik titartaasartoq oqarpoq, nangillunilu:

- Illorsuit taakkua marluk iluarsaassinnarlugit ilui allanngorsassavagut, taamaalillutik inuussutissarsiornikkut takornariaqarnikkullu nunaqarfimmut siuarsaaqataasinnaaniassammata, Frands Frandsen oqarpoq.

Illorsuit taakkua marluk 10 million koruuninit minnerunngitsumik aningaasaliiffigineqarlutik iluarsaanneqassapput, Realdania Byg-imiilli aningaasat qasserpiaat atorniarneqarnersut ersarissumik oqaatigineqarusunngikkallarpoq:

- Kisianni tassa qularnanngilaq suliassaq pimoorullugu ingerlanniaripput, aningaasarpassuarnillu naleqassaaq. 10 million koruunit tungaanut iluarsaannissaanut atussagunarput. Kisianni qanorpiaq atuiniarnerluta eqqaarusunngikkallarpara. Taamaattorli oqaatigisinnaavara illorsuit eqqissisinneqarnerannut tulluusimaarutigineqarnissaannullu naammattunik aningaasaliiniaratta, Frands Frandsen oqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq