Ilimanamut takornariartartut amerliartorput

Ilulissat kujataanni Ilimanami nunaqarfimmut takornariartitsisarneq ingerlalluarpoq nunaqarfimmiullu takornariartitsineq piorsagassaqqissutut siunissarissaartutullu isumaqarfigaat.

Ilimanami unnuititsilluni takornariartitsisarneq siorna aallartinneqartoq ingerlalluarpoq, siorna misiliinermut sanilliullugu unnuisitsisarnerit marloriaammik amerlanerulereersimapput, siornalu oktobarinnguinnaraa aasaq manna Ilimanamut unnuiartorniartut unnuiffissat inniminnerlugit tamakkereersimavaat.

Ove Villadsenip illut marluk siumoorlutik inniminneereerlutik unnuiniartunut atortarpai illulu ataaseq ulluinnarlutik takornarianut Qasigiannguaniillu pisullutik akunnittunut atortarlugu.

Ove Villadsen kisimi Ilimanami takornariartitsinermik aallutaqanngilaq, Arne Lange ilaquttanilu qangali takornarianik ulluinnarlutik kalaaliminertoriartortunik isumaginnittaramik. Takornariallu kalaalimertortinneqaraangamik puisip neqaanik ilaatigut tamussertinneqartarput.

Ilimanaq nunaqarfik naggorilluinnarlunilu minguilluinnartuuvoq tikillugu alianaatsoq, takornariartitsinerup ineriartortinnissaa Ove Villadsenip takorluugaqarfigaa.

Ilulissani takornariartitsiviit assigiinngitsut marluk Ilimanarmiunit suleqatigineqarput.