Ilimanami suliniut kinguaattoorpoq
Kisianni Ilimanaq pillugu suliniummi suleqatigiinniarlutik isumaqatigiissuteqarsimasut pisussaaffitik tamaasa naammassisinnaappatigit, illorsuarnik pisoqqanik marlunnik iluarsartuussineq takornariallu illuarassaannik nutaaliaasunik 15-inik sanaartorneq 2015-imi aallartissinnaavoq.
- Kommuunip tungaaninngaanniit tusarniaanerit ippassaq naammassipput. Taava massakkut teknikkeqarfimmi suliaq kommunalbestyrelsimut saqqummiussassanngorlugu qaqinneqartussanngorlugu suliarineqassooq. Taannalu kommunalbestyrelsimi naatsorsuutigaarput marsip 26-ani qaqinneqassasoq, Qaasuitsup Kommuniani Inuussutissarsiornermut, Aatsitassarsiornermut Takornariaqarnermullu Ataatsimiisitaliami siulittaasoq, Palle Jeremiassen, oqarpoq.
Taamaattumik sanaartorneq iluarsartuussinerlu suli aallartinneqanngilaq suliniummi isumaqatigiissuteqarfigineqartut ilaat, World of Greenland, illuaqqanut nutaaliaasunut 15-inut sanaartorfissaminik nunaminertamik suli tunineqanngimmat. Illuaqqat Realdania Bygip, Qaasuitsup Kommuniata World of Greenlandillu Ilimanaq pillugu isumaqatigiissutaat najoqqutaralugu sananeqartussaapput:
- Soorunami naatsorsuutigaarput isumaqatigiissut taanna iluatsikkumaartoq. Illuaraliorfigineqartussat akuersissutigineqarumaartut. Tamatumalu kingorna apeqqutaalissaaq ukioq manna aallartissinnaanersugut. Kisianni ilimaginngilara tamanna angumerisinnaagipput. Ilimanarneruvoq aappaagu tamanna pisinnaasoq. Uagummi aamma iluarsartuussinissatsinnut pilersaarusiornerput naammassisariaqarparput. Taannalu aallartereerparput. Kisianni suararpassuit tamarmik ilanngussorneqassapput. Sanasut siunnersuisartullu isumaqatigiissuteqarfigineqassapput. Tamatumunngalu ukiaq atussagunarparput, aatsaallu sanaartornerit 2015-imi aallartisarneqalersinnaassapput, Frands Frantsen, Realdania Byg sinnerlugu Ilimanami suliniummi aqutsisoq oqarpoq.
Ilimanaq pillugu suliniummi suleqatigiit pilersaarutaat tamarmik iluatsissappata Ilimanaq aningaasaliiffigineqarluartussanngorpoq. Suliniummi tamarmi 40 million koruunit palillugit akeqarsinnaasoq naatsorsuutigineqarpoq, suleqatigiillu tamarmik annertoqatigiipajaanik aningaasaliissuteqarniarput.
- Kommunalbestyrelsimut saqqummiunneqarpat aningaasartuutissat tamarmik tassunga tunngasut saqqummiunneqassapput, Palle Jeremiassen oqarpoq nangillunilu:
- Taamaattumik pissangartorujummut massakkut killeqqavugut. Massakkut tassa alloriarneq tulleq sanaartornermut nooriarnissaq taanna massakkut killiffittut taasinnaavarput.
Taamaattumik marsip 26-at Ilimanamut suliniummi ulluusussaassaaq pingaarutilik:
- Ulloq taanna pingaaruteqarluinnarpoq. Taamanikkussamummi paasissavarput World of Greenlandi illuaraliorfissaminut akuerineqarsimanersoq. Iluatsinnissaalu pingaaruteqarluinnarpoq. Taamaanngippammi suliniut iluatsissinnaanngimmat, Frands Frantsen oqarpoq.
Ilimanarmiut suliniummut neriulluartut 25-t missaat innuttaasunik ataatsimiisitsinermi ippassaq najuupput. Sanaartornissamut pilersaarutit kinguaqqinngippata Ilimanaq pillugu suliniummi suleqatigiit suliniutip 2017-imi maajimi piareersimanissaa naatsorsuutigaat.
