Ilimagisamit aalisarneq ingerlanerlunnerusoq

Sermitsiap kisitsisit pissarsiarisimasai naapertorlugit sapaatip-akunnera una tikillugu pisassiissutinit 100.000 tonsiusunit 36.000 tonsiinnaat pisarineqarsimapput. Aalisarnissamut akuersissutit aggustip 15-ianut killeqarput.

Aalisarneq taama ingerlaannassappat pisassiissutit tamakkerlugit pisarineqarnissaat qularnarpoq. Avaleraasartuunik pisaqarluarsimannginnermut silap atoruminaassimanera tunngavilersuutigineqarpoq.

Tamanna Aningaasaqarnermut Naalakkersuisumut, Vittus Qujaukitsumut, tusagaq nuannerpallaarnaviarunanngilaq. Tassami avaleraasartuunik aalisarnermit isertitat Aningaasanik Inatsimmi amigartoorutissaraluanut matussutigineqarnissaat naatsorsuutigineqarmat.

Pisassiissutini 100.000 tonsiusuni 90.000 tonsit agguaanneqarsimapput, 10.000 tonsillu kingulliit kingusinnerusukkut agguaanneqartussaallutik.
Pisassiissutit 10.000 tonsiusut kingulliit qanoq agguataarneqassanersut Aalisarnermut Piniarnermullu Naalakkersuisoqarfiup, pisassiissutit tamakkerneqarnissaat qularnarmata, piffissami qanittumi nalilersorniarpaa.

Naalakkersuisut 57.000 tonsit kilisaataatilinnut agguaatereersimavaat, 33.000 tonsillu kilisaatinik attartorlutik aalisartunut agguaassimagaat Sermitsiaq allaaserisaqarpoq.

Aamma allaaseraat Namminersorlutik Oqartussat aalisarnissamut akuersissutinik 18-inik tunniussisimasut, sapaatip-akunneratalu siuliani aalisariutit 18-it aalisarsimasut.