Ileqqorissaarnissamut isumalioqatigiisitaq amigaataavoq
Inuk katsorsarneqarsinnaanngivissumik napparsimappat peqqinnissaqarfimmit ikiorneqarluni toqumut ikiorneqarnissaa pillugu oqallinneq aallartippoq.
Ileqqorissaarnissamik eqqarsaatiginneqqissaarnissamut attuumaassuteqarluinnartoq, katsorsarneqarsinnaanngitsumillu napparsimasut ikiorneqarlutik toqusinnaalersimanerat ullormiit ullormut aallartinngilaq, Peqqinnissaq pillugu kattuffiit siulittaasuat Birtha Bianco oqarpoq.
- Holland-i assersuutigissagutsigu, nunami tassani napparsimasunik katsorsarneqarsinnaanngitsunik toqumut ikiuisinnaalersimaneq, ukiorpassuit atorlugit misissuinerit oqallinnerillu ingerlaqqaarsimapput. Inatsiserpassuit atuuttariaqarput aammalu ileqqorissaarnissaq anguniarlugu oqallinnerit ingerlanneqaqqaarsimapput. Aamma napparsimasut toquinnarnissamut ikiortinniarlutik aalajangertut ullormiit ullormut ikiorneqartarnerat pineq ajorpoq, qaammaterpassuilli aatsaat misissuinerit aalajangiiniarnerillu peqqaarlutik, toqunissamut ikiuisoqarsinnaasarpoq. Aamma nakorsat toqutsinissamut ikiuisussat immikkut ittumik ilinniarsimasuusariaqarput, Birtha Bianco oqarpoq nangillunilu: - Ileqqorissaarnissaq anguniarlugu Nunatsinni isumalioqatigiisitamik peqartuuppat, oqallinnerit aallartilluarneqarsinnaagaluarput, taamaasillunilu aamma aalajangiisinnaanerit pisinnaalissagaluarlutik. Birtha Bianco oqarpoq nangillunilu: - Maannakkut passiv dødshjælpimik taaneqartartumik napparsimasunik ikuisoqartarpoq. Imatut paasillugu napparsimasoq ilaqutaalu isumaqatigalugit, uumaannarnissaq anguniarlugu ikiorsiissutinik iissartakkanik assigisaanillu tunioraaneq unitsinneqarsinnaavoq, nipaallisaatinillu tunioraaginnarneq tassani ingerlanneqalersarpoq, soorlu nipaallisaatit sukkanerusumik toqujartortitsisinnaasartut, tassa taanna passiv dødshjælp-imik taaneqartartoq. Aktiv dødshjælp tassaavoq katsorsarneqarsinnaanngitsumik napparsimasumik toqunissaanut ikiuigasuarneq. Soorlu toqussutaasinnaasumik kapuummik toqupallatsitsisinnaasumik tunniussisinnaaneq tassani pineqarpoq, Birtha Bianco naggasiilluni taama oqarpoq.
