Ileqqoreqqusat pillugit KANUKOKA Namminersorlutillu Oqartussat ataatsimiissapput
- Kommunit ileqqoreqqusaasa allanngortinneqarnissaat, aasaru juunip naanera nallertinnagu Namminersorlutik Oqartussanit piffissaliunneqarsimasoq atuutiinnarallassaaq, Naalakkersuisut siulittaasoqarfiani pisortaanerugallartoq, Søren Hald Møller KNR-imut oqarpoq.
Taanna taama oqarpoq, kommunit ilaannit piffissaliunneqartoq angumerineqarsinnaanngitsutut nalilerneqareersorlu.
Kommunit KNR-imit sapaatip akunnerani kingullermi oqaloqatigineqartut pingasut akornanni marluk oqarput, Namminersorlutik Oqartussat piffissaliussaat angumerineqarsinnaanngitsoq.
Kommunit 2009-mi sisamaannanngortinneqarnerisa kinguneranik, kommunini ileqqoreqqusat ilaat atorunnaarsinneqartussatut aalajangerneqarpoq, kisianni tassa ileqqoreqqusat ilaat ulloq manna tikillugu kommunit allanngortinneqaratik.
Aamma atuaruk Inatsisit nutaanngilisut pillugit kommunit assigiinngitsunik nassuiaateqarput
Tassalu tamannarpiaq pissutigalugu, Namminersorlutik Oqartussanit piumasarineqarluni aasaru sulinngiffeqarnissaq nallertinnagu tamanna kommunit aaqqinneqartariaqartoq.
Naalakkersuisup siulittaasoqarfiani pisortaagallartup, Søren Hald Møllerip kommunit angummassinnaannginerat uggorigaluarlugu, taamaattoq taanna KNR-imut oqarpoq, nuannaarutigalugu ileqqoreqqusat aaqqissuunneqarneri kommuninit maanna allaartinneqareerlutik suliarineqartut.
- Pingaarnerpaavoq kommunit pimoorussillutik maanna suliniarlereersimaneri, qaqugu naammasinissaat pingaaruteqarnerunani, Søren Hald Møller oqarpoq.
Aamma atuaruk Ileqqoreqqusat allanngortinneqarnissaat kommuninit angumerineqarsinnaanngilaq
Piffissaliussaq kommunit angumerineqarsinnaanngitsoq paasilluarsinnaallugu, KANUKOKA-p pisortaata, Hans Peder B. Christensenip KNR-imut oqaatigaa. Tassa inatsisit pillugit ilisimasalinnik kommunini sulisut ikippallaarneri tamassumunnga pissutaasoq oqaatigalugu.
