Ilassinnissutit ikilisinniarneqarput

Naalakkersuisut ilassinnissutinut aningaasat atortagaat Demokraatiniit killilersimaarniarneqarput. Inatsisartut ullumi ataatsimiilerpata Demokraatit siunnersuutigissavaat ilassinnissutinut kontit atugassat mio. koruunit affaannik sipaarutaasinnaanerat.

- Siorna ilassinnissutinik atuipiluttoqarnera killilersimaarisoqartariaqarneranik takussutissiivoq, Per Berthelsen oqarpoq.

- Ajuusaarnaraluartumik siorna annertoorujussuarmik oqallisaallunilu takuneqarpoq ilassinnissutinik atornerluineq, taanna pinaveersaartikkumallugu massakkut erseqqilluinnartunik malittarisassanik pilersitsinissamik siunnersuuteqarpugut, nangippoq.

Ilanngullugu aamma killilersuivigitinnialerpaat inatsisartuni siulittaasup ilassinnississinnaanermut atorsinnaasai.

- Taama ililluta siunissami atornerluinermik nuanniitsumik takutitsisinnaanerit pakkersimaarusuppagut aammalu inuiaqatigiinni sipaarutissanik suaaruteqartuartuulluta aamma nammineq salliulluta torersumik ingerlatsiumanernik takutitsinissarput uani pingaartillugu, Demokraatit oqarput.

Ukiut qulit ingerlanerini ilassinnissutissatut aningaasartuutit 130 procentimik qaffakkiartorsimasut partiip naatsorsorsimavaa.

Demokraatit siunnersuutaat inatsisartuni ullumi siullermeerneqassaaq.