Ilassinnissutaasimasut ilaannik utertitsilerpoq
Aalisarnermut Piniarnermullu Naalakkersuisuusimasoq Rasmus Frederiksen, Naalakkersuisuunermi nalaani, ilassinninnermut aningaasartuutinik atortarsimasami ilaannik, 31.000 koruunit missaanniittunik, nunatta karsianut utertitsiniarluni aalajangerpoq.
Rasmus Frederiksen ima nassuiaavoq:
- Piffissami sivisungaatsiartumi Namminersornerullutik Oqartussat inatsisilerituuat uangalu inatsisilerituup atukkama akornanni, qaammatini taakkunani Naalakkersuisuusimaninni aningaasartuutaasimasut, nalilersoreerlugit ammalu piffissami sivitsortumi aammalu inuunera ingerlateqqittariaqarakku, naggataatigut taamatut aalajangersimavunga. Tamakkiisumik tunginniit akuersaarnanngikkaluartoq, annikinnerusumik, allaat uanga tunginninngaanniit akileeqqittussaanngikkaluarlunga nalilersimagaluarlugu, aalajangersimavunga akiliiniarlunga.
- Politiit misissuinera ingerlaannassaaq, soormita akiliiniarlutit aalajangerpit?
- Suliassaq qaammatini arlalinni ingerlasimasoq, uannut ilaquttannullu nanertuusersuisimaqaaq, inuuneralu ingerlaqqittariaqarluni. Aamma inatsisilerisut paarlaassimanerisa kingunerisaanik, uteqattaartumik aalajangertaqattaarnerit pisimapput, uannut toqqissisimanarunnaarsimapput, taamaammat aalajangersimavunga, inatsisilerituut uteqattaarinerat naammalersoq, aningaasallu taakkua akilissallugit aalajangersimavunga.
Aamma inatsisilerituut uannut aningaasartuutaangaatsiarsimapput.
Taama oqarpoq Aalisarnermut Piniarnermullu naalakkersuisuusimasoq Rasmus Frederiksen.
2004-miit 2005-imi juunip qaammataata tungaanut, Rasmus Frederiksen-ip Aalisarnermut Piniarnermullu Naalakkersuisuunermi nalaani, ilassinnittarnernut aningaasat katillugit 160.325 koruunit atorsimavai.
