Ilassinninnermut misissuisoqalernera illua’tungiliuttunit iluarisimaarneqarpoq

Naalakkersuisut siulittaasuata Hans Enoksen-ip 2004-mut ukioq mannamullu juni tikillugu naalakkersuisut ilassinninnermut atorsimasaat tamaasa uppernarsaataannik kukkunersiuisunit misissuisitsilernera naalakkersuisunut illua´tungiliuttut iluarisimaarpaat.

Naalakkersuisut ilassinnittarnermut siorna ukioq mannamullu juunip tungaanut atorsimasaat kaajallaasitaq malillugu atorneqarsimanersut qulaajarniarlugu Naalakkersuisut siulittaasuata Hans Enoksen-ip kukkunersiuisartut Deloitte Revision A/S misissuitilerpai.

Naalakkersuisunut illua´tungiliuttut misissuititsilerneq iluarisimaarpaat.

-Naalakkersuisut siulittaasuata taamatut piumasaqarnera ajorinngilluinnaqqissaarparput. Aamma tupiginngilarput inunnit assigiinngitsorujussuarnik oqallisigineqarnerat. Erseqqissumik qulaarneqarnissaat naalakkersuisut siulittaasuata uppernarsarniarmagu ajunngilluinnaqqissaarpoq, Finn Karlsen oqarpoq.

Kukkunersiuisussat Deloitte Revision A/S naalakkersuisunit atorneqartarput, tamannalu Atassummit ippigineqanngilaq.

-Isumaqarpunga apeqqusernissaanut tunngavissaqanngitsoq. Kukkunersiuisartut arlaannaalluunniit attuumassuteqanngilaq, uppernarluinnaqqissaartumik ukiut tamaasa landskarsip naatsorsuutai misissortarpaat. Kukkunersiuinermut ataatsimiitsitaliap uparuartugai unneqqarissumik uparuartortarpaat, taamaammallu isumaqarpunga tatiginarluinnaqqissaartut. Taamaammat ippinnartoqanngitsutut isumaqarfigaakka, Finn Karlsen oqarpoq.

Naalakkersuisut siulittaasuata misissuititsilernera Demokraatinit aamma tapersersorneqarluarpoq.

- Demokraatininngaannit Hans Enoksen avataaninngaannit kukkunersiuisartunik misissuititsilernera tapersersorluinnaqqissaarparput, Palle Christiansen Demokraatineersoq oqarpoq.

Ilanngullugu oqaarpoq, paasisinnaallugu kukkunersiuisartut Deloitte Revision A/S misissuisussatut toqqarneqarsimammata, taakkuummatami landskarsip naatsorsuutaanik misissuisartut pissutsinillu ilisimasaqartut.

Naalakkersuisut ilassinninnermut atorsimasaat misissorneqalernerat Inuit Ataqatigiinnit aamma iluarisimaarneqarpoq. Uggorineqarporli ilassinninnermut atorneqartartut ataavartumik misissorneqartannginnerat.

Namminersornerullutik Oqartussani pisortaaneq Kaj Kleist-ip oqaatigaa, Deloitte augustip naanissaata tungaanut misissuinissaminnut periarfissinneqarsimasut. Kukkunersuinermut nalunaarusiaq inatsisartut ukiamut ataatsimiinnissaat aallartitsinnagu naammassineqareersimassammat.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat