Ilassinninneq ukiumut 410.000 koruuninik nalilik

Naalakkersuisup Jens Napaattuup 2004-imi ilassinninnermut 400.000 koruunit sinnerlugit, agguaqatigiissillugu ullormut 1.400 aningaasartuutigisimavai. Naalakkersuisut akornanni taamaalilluni ilassinninnermut aningaasartuuteqarnerpaasimalluni.

Naalakkersuisut ilassinninnermut kaajallaasitaanni ilaatigut allassimavoq, ilisarititsinissamik pisariaqartitsisoqartillugu immikkullu pissutissaqartoqartillugu aatsaat aningaasartuuteqartoqartassasoq.

Jens Napaattuup ilassinninnermut aningaasartuutigisimasai naapertorlugit, 2004-mi ullut tamarluinnangajammik ilassinninnermut pissutissaqarfiusimapput.

Uppernarsaatit malillugit aningasartuutit amerlanersaat, nunani allani nerilluataarnernut kiisalu Nuummi neriniartarfimmi Charoen Pornimi 24-riarluni atorneqarsimapput, tassani katillugit 42.000 koruunit aningaasartuutigineqarsimallutik. Tassani nerinerit tamangajammik assigiipput tassalu: Kalaallisut sushi, viinnit puiaasat arlariit, siuleqqiutit kinguleqqiutillu kiisalu Grønlandsk kaffemik taaneqartartut arlalissuit, ataaseq 110 koruuninik akilik. Akileraartartut aamma pujortagassanut akiliigujaat siorna februaarimi ilassinninnermut tassunga immikkuullarissumut.

Akileraartartut akiligaannik unnuk alla immikkut ilassinninnermi, inuit tallimat tamarmik Napaattuumik kinguliallit aamma nereqatigiissimapput.

Nuummi Hotel Godthåb, Skyline Bar allallu unnuami ammasartut arlaleriaqaluni aamma ilasseqatigiiffiusarsimapput, uppernarsaatillu malillugit akuttusimanngilaq unnuarornerani tamakku pisarsimaneri. Unnuaruulluguli ilasseqatiginninnerit nunatsinni kisimi pisarsimanngillat.

Københavnimi SAS-ip hoteliisa ilaanni, unnuakkut nalunaaqutaq ataatsimut, Napaattooq Siumukkormioqataalu inatsisartunut ilaasortat, akileraartartut akiligaannik whiskymik arlaleriarnissaminnut aamma periarfissaqarsimapput. Ilasseqatigiinnermut aningaasartuutigineqarsimasut ilagaat atisaajarlutik isiginnaartitsiviit ilaanni, Wonder Barimi imeruersaatinut akiliutaasimasut.

Ilanngullugu eqqaaneqanngitsuugassaanngilaq, Napaattuup avatangiisinut allaffimmi pisortarisimasani, Marianne Jensen allatsigisimasanilu Gaba Kristiansen, siorna juunimi 4.000 koruunit sinnerlugit akilinnik nerilluataarsimanerat. Inuit taakku taanerinut pissutaaginnarpoq, kaajallaasitap piumasarigaluarmagu, ilassinninnerni minnerpaamik inuup ataatsip Namminersornerullutik Oqartussat avataanneersuunissaa.

Akileraartartut akiligaannik angerlarsimaffimmi atortussanut pisissalluni aamma immikkut pissutissaqarsimagunarpoq, tassami februaari 2004-mi ilaatigut natermut kumigutinik erruinermilu børstinik pisinermi, sapaatip akunneratalu tulliani betonimut kikissanut 78 koruuninik nalilinnik akileraartartut akileeqataasimammata.

Naalakkersuisunut ilaasortaq qaammammut 60.000 koruuninik aningaasarsiaqarpoq, taakku saniatigut assigiinngitsunik ajunngitsorsiassaqarluni.

Jens Napaattuup aningaasartuutigisimasai pillugit arlaleriarlugu oqaloqatiginiartarsimagaluarparput, Naalakkersuisulli siulittaasuannut Hans Enoksenimut innersuussisarpoq, Hans Enoksenili aamma oqaaseqarumanngilaq.

Jens Napaattooq maajip aallartinnerani tusagassiuutitigut aamma sammineqarpoq, qaammatit arfineq-marluk nammineq inimini utaqqiisaasumik ineqarsimanera sammineqarmat.

Nuuk TV suleqatigalugu paasissutissat pissarsiarineqarput.

Isummersuutit

inatsisartut-sal-sep2019.jpg

Inatsisartut Ukiakkut Ataatsimiinnerat



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat