Ilasiaq iluatsitsiffiulluartoq
Meeqqat Ilasiami najugaqartut assigiinngitsunik ajornartorsiuteqarput. Soorlu assersuutigalugu tassaasinnaapput uniffeqanngitsut aammalu pissusilersornikkut misigissutsikkullu ajornartorsiuteqartut. Angerlarsimaffik ilinniarsimasunik sulisoqarpallaanngitsoq, meeqqanik tamakkuninngarpiaq ajornartorsiuteqartunik sullissinermik immikkut ilisimasaqarfiulersimavoq, sullissinerallu pitsaalluinnarpoq.
-Pitsaasunik sulisoqarpoq, tunniusimasuugamik ilinniarusussuseqartuullutillu. Taamaasillutik meeqqanut tunngatillugu ilinniagaqarsimanngikkaluarlutik piginnaasatik annertusarpaat. Ilasiami atuartitsineq tarnip pissusaanillu nakkutilliineq iluaqutigalugit annertuumik angusaqartoqarsimavoq. Sulisut taamaasillutik meeqqat angerlarsimaffimmi najugaqartut pissusilersuutigisartagaat ilisarisinnaanngorsimavaat, tamannalu meeqqanut angerlarsimaffimmi najugaqartunut ilaqutaalluarsimavoq, SFI-mi ilisimatuut ningiuat Else Christensen, nalunaarusioartuusoq oqaluttuarpoq.
Meeqqat Ilasiami najugaqartut amerlanersaat angajoqqaamik inooriasiat pissutigalugu najugaqalersarput. Imigassamik ikiaroornartumillu atornerluineq matumani pineqarpoq, tamatigullu angajoqqaat qitornaminnik ima sumiginnaasarsimatigipput allaat ilaqutariit angerlarsimaffiannit arsaarinnissutigineqarlutik angerlarsimaffimmut inissinneqartariaqartarlutik.
-Meeqqat sumiginnagaanermik ima sakkortutigisumik misigitinneqarsimapput aallat naleqqutinngitsumik qisuariartariaqalersimallutik. Angerlarsimaffimmi akerleriinnerit pisarsimapput, soorlu immaqa nerisassaqannginnertik pissutigalugu, toqqissisimanermilli misigisimanissaq, meeqqap peroriartornermini pisariaqartilluinnagaa amigaatigineqarsimasoq qularnanngilaq. Meeqqat imminnut illersorniarlutik avataanit suliniutaasut mattuttarpaat. Iliuuseqannginnerminni paasiniaaqqaartarput, piumaffigineqaraangamillu tamatigorluinnangajak tammariartuinnartarlutik, Else Christiensen isumaqarpoq.
Angerlarsimaffiup Ilasiatut ipput nukittoqqutigisaasa ilaat tassaavoq meeqqat sivisuumik tassani najugaqarsinnaanerat taamaasillutillu sulisunik sungiussisinnaasarnerat. Sulisut naammagisimaartut meeqqanik ilaatigut sakkortuumik qisuariarsinnaasartunik sullisserusuttut piginerisigut meeqqat Ilasiami najugaqartut angusarissaarfigineqartarput.
-Nalunaarusiorninnut atatillugu meeqqanik, angajoqqaanik, sulisunik tungiuinermullu ingerlatsivimmi sulisunik oqaloqateqarpunga, tamarmillu Ilasiami pissutsit naammagisimaartupilussuuaat. Meeqqat sullinniarneri ilungersunarsinnaasarpoq, sulisulli ilungersunartut qanoq iliuuseqarfiginissaat ilisimareertarpaat meeqqallu qanoq iliornissaannik ilinniartittarlugit. Meeqqat inuunermik aqunnissaanut annilangaanerminnillu akiuiniarnissaminnut sakkussaqartilersimagaanni, taava angerlarsimaffimmi Ilasiamiinnerat iluatsilluartutut nalilerneqarsinnaavoq, Else Christensen knr.gl-imut nassuiaavoq.
