Ilaquttamit najorteqarsinnaanini iluaqutigeqaa

Arnaq inuusuttunnguaq 17-inik ukiulik Rita Christensen Sisimiuneersoq USA-mi marsimi sisorartilluni ajutoorujussuarpoq, maannalu pisussinnaajunnaaqqalluni.
Allattoq Najaaraq Egede
maajip 18-at 2008 13:18

Qiterminik napisisimasup taassuma ilaquttami akiliunneqarlutik najortigisinnaanerat assut nuannaarutigaa.

Inatsisartut akuereqqammerpaat inatsit nutaaq qitornat 18-it inorlugit ukiullit Danmarkimi nakorsartittariaqartut angajoqqaaminnit qanigisaminnilluunniit allamit oqartussanit akiliunneqarlutik ilagineqarsinnaanerat.

Rita Christensenip Sjællandip avannaani manna pisussinnaajunnaaqqalluni assakaasulinnik kørestolerneq ilinnialeruttorpaa.

- Ajutoorneq uanga misigisattut atsigisoq pigaangat, inuunerlu allanngorluinnaraangat, timip pisariaqartitai peqqinnissaqarfiup tunniussinnaasai naammakkunnaartarput, qaniginerpaasanilli tarnikkut tapersersorneqarnissaq aatsaat taama pisariaqartitsigineqalersarpoq, Rita Christensen oqarpoq.

Oqaluttuarpoq marsimi ajutoornermi kingorna angajoqqaani, pingaartumillu angunni tamaviaarluni, aningaasatigut annaasaqaraluarluni, anaanaminik najorteqaannarnissani sorsuutigisimagaa.

- Ataataga anaanama uannik najuiinnarnissaanut suliniarsimaqaaq, aammalu ajutoorama namminersortutut suliani qimaannarlugit USA-mut ornittariaqarnikuullunga. Anaanaga najortigaara, ataatamalu suliassat kinguaattoorutini maanna tamaviaarluni angumeriniarsarai, Rita Christensen oqaluttuarpoq.

Unnugu radioaviseqarnitsinni apersorneqarnera tusarsinnaajumaarparsi.