Ilaqutarsiat aningaasarsiaasa qaffanneqarnissaat tapersersorluarpaat

Meeqqanut pissuteqavissumik angajoqqaaminniissinnaanngitsunut ilaqutarsianut tusarluarnartumik nutaarsiassaqarpoq.

Ilaqutarsiat tapisiaasa qaffanneqarnissaannik Demokraatit siunnersuutaat Inatsisartunit tupaallannartumik ippassaq tapersersorluarneqarpoq.

Tapisiat ukiuni 20-ni allannguuteqarsimanngivipput. Meeqqat isaasalerlugu ”nalinginnaasut” ilaqutarsiaat, imaluunniit angajoqqaarsiaat, massakkut qaammammut 3298 koruuninik tapisisarput, meeqqanullu isaasalerlugu ”pisariusunut” ilaqutarsiat qaammammut 4.254 koruunisisarlutik.

- Tamanna akuerineqarsinnaanngivippoq ullutsinnullu naleqqutinngivilluni. Ilaqutarsianut suliaqaqisunut atugassarititat pitsaanerulertariaqarput, Demokraatineersoq Palle Christiansen Inatsisartunut ippassaq oqarpoq. Palle Christiansen isumaqarpoq, ilaqutarsiat tapisiaqarnerulerpata amerlanerusut angajoqqaarsianngornissartik soqutigilissagaat, ilaqutarsiassammi amigaatigineqaqimmata.

Tunngavilersuutillu tamakku upperineqarluinnarsimagunarput, siunnersuummi Naalakkersuisuniit Inuit Ataqatigiinnillu taperserneqanngikkaluartoq, ilaqutarsiat tapisiaasa qaffanneqarnissaat Inatsisartut sinnerisa tapersersorpaat.

Siunnersuut aappassaaneerneqartigani Ilaqutariinnermut ataatsimiititaliami oqaluuserineqassaaq.