Ilaqutariit tallimat ipillutik ajunaartut
Ilaqutariit inuit tallimasut Upernavik Kujallermiit Upernavimmukartillutik ipillutik ajunaarput.
Pineqartut tassaapput inersimasut pingasut meeqqallu pingasut. Taakku kingullermik takuneqarput ataasinngormat Kangersuatsiamiit aallarmata.
Politimestereqarfik nalunaarpoq maqaasineqartunik ujallerneq ippassaq ualikkut aallartissimasoq. Ujarneqartut umiatsiaq poca angallatigisimavaat. Umiatsiaaqqat pingasut erngerlutik ujaasineq aallartippaat. Aasiaallu Radioatigut kalerrisaarisoqarpoq ilutigitillugulu Kangersuatsiaami kommunefoged peqquneqarpoq avannamut ujaaseqataaqqullugu.
Ippassaq ualilluinnartoq umiatsiaq ujarneqartoq nassaarineqarpoq, tissukartoq. Umiatsiap eqqaani inersimasoq puttasoq aamma nassaarineqarpoq, kingusinnerusukkullu ujarneqartut sinneri nassaarineqarput tamarmik ipisimasut.
Politiit nalunaarput ujaasinerup nalaani pujorsimasoq Upernaviullu kangiani kujataanilu ujaasiffiusumi anorlersimasoq. Pujornera pissutigalugu timmisartumik qulimiguulimmilluunniit ujaasisitsinissaq ajornarsimasoq ilanngullugu nalunaarutigineqarpoq.
Ajunaarsimasut tassaapput Poul Christiansen, 35-nik ukiulik taassumalu nulia Susanne Christiansen aamma 35-nik ukiulik, taakkulu qitornaat arfinilinnik aqqanilinnillu ukiullit kiisalu Elionora Eliassen 40-nik ukiulik. Taakku tamarmik Upernavimmiupput.
