Ilaqutariit piitsut juullimut tapiissuteqarfiginiaraat
Nunatsinni juulli nalliuttorsiutigisarnera ileqquuvoq juullili akisusinnaasarpoq. Ilaqutariit ilai juullisiornissaminnut akissaqarneq ajorput, soorlu juullimi nerisassat nerineqartartut tunissutissallu akissaqartinneq ajorpaat. Kalaallit Røde Korsiata nunatsinni immikkoortortaqarfii ukiut tamaasa juullimi tapiissutinik tunioraasarput, soorlu pisiniarfinni pisissutaasinnaasut gavekortit aamma juullimi nerisassanik imallit koorit tunniussuunneqartarput.
- Maani nunarsuarmi allamitulli inoqartarpoq juullerneranut atatillugu meeqqaminnut qiimassaasinnaanngitsunik, tassami taamaaliornissaminnut akissaqannginnamik taakkualu ikiorusuppagut. Taamaalillutik juullimi tunissutissarsisinnaalertarput, Kalaallit Røde Korsiata Nuummi immikkoortortaqarfiani siulersuisuni ilaasortaq aamma Nuummi atornikuerniarfimmi aqutsisoq, Aase Nygaard oqarpoq.
Nuummi Kalaallit Røde Korsiata immikkoortortaqarfiata ukiumut 200.000 koruunit missaaniittut juullimi tapiissutitut ilaqutariinnut inunnullu ataasiakkaanut tunniuttarpaat, pisiniarfinni pisissutigineqarsinnaasut gavekortit tunniunneqartarlutik. Inuit taamaalillutik nuannersumik juullisiornissaat ammaanneqartarpoq.
- Taava juullimut tunissutissanik pisisinnaalertarput aamma juullimi nerisassaminnik, kisianni soorunalumi imigassanut cigaretinullu atorneqassanngillat, Aase Nygaard nassuiaavoq.
Nuummi ukioq kingulleq qinnuteqartut 200-ut missaaniipput qinnuteqartullu affai sinnerlugit pisiniarfinni pisissutissanik gavekortinik tunisipput.
Qaqortumi Kalaallit Røde Korsiata immikkoortortaqarfia pisiniarfinni pisissutigineqarsinnaasunik gavekortinik tunioraassamaarput:
- Ukioq manna sullinniakkagut tassaapput utoqqalinersiuteqartut siusinaartumillu soraarnerussutisiallit, taama Kalaallit Røde Korsiata siulittaasuat Tove Blidorf oqarpoq.
Qaqortumi juullimi tapiissutinik perusuttut qanoq sumullu qinnuteqarsinnaassanersut kingusinnerusukkut nalunaarutigineqarumaarpoq.
Ilulissani Kalaallit Røde Korsiata immikkoortortaqarfiata Ilulissani nunaqarfigisaanilu ilaqutariit ikiorneqarnissamut pisariaqartitsinerpaat juullimut nerisassanik imalinnik koorinik tunisarpaat. Ukioq kingulleq Lions Club peqatigalugu koorinik 31-inik tunisipput. Ilulissani inunnik isumaginnertoqarfik ikiorsiullugu kikkut ikiorneqarnissamik pisariaqartitsinerpaanersut nassaarineqartarput.
- Maani Ilulissani innuttaasunit tigulluarneqartarpoq, taama Kalaallit Røde Korsiata Ilulissani immikkoortortaqarfiani siulittaasoq Rakel Reimer Jensen oqarpoq.
Maniitsumi Kalaallit Røde Korsiata immikkoortortaqarfiata pisariaqartitsisunut juullimi tapiissutinik tunisinissaminnik aamma pilersaarput. Sulili Maniitsumi siulersuisut aalajanginngillat juullimi tapiissutit qanoq amerlatigisut tunniusuunneqassanersut aatsaallu novembarip qaammataanni tamanna ataatsimiissutigineqassaaq, taama Kalaallit Røde Korsiani siulersuisuni ilaasortaq Kunuunnguaq Olsen oqarpoq.
