Ilaqutariit ingerlalluartut angerlarsimaffeerussinnaapput

Ilaqutariit inissinneqarallarsimasut pillugit ajornartorsiut isumasioqatigiinnermi eqqartukkat annerusut ilagaat.

Radioaviismit naapipparput anaanaq arlalinnik meeralik, utaqqiisaasumillu inissinneqarallarsimasoq.

- Angerlarsimaffeqarani imaannaanngilaq....meeraqarluni ingammik. Qinuneq uannut nukittorsaataasimaqaaq, arnaq 42-nik ukiulik, aterminillu isertuusserusuttoq taama oqarpoq. Arnap aqqa radioaviisimit ilisimavarput.

Taanna meeqqanilu, qaammatit pingasukkaarlugit utaqqiisaasumik inissinneqartarput. Nuutsitaanerillu tamarluinnaasa ilisimaneq ajorpaat, kikkut qanorlu ittut ineqatigissanerlugit, tassami utaqqiisaasumik inissinneqarnermi, angerlarsimaffeqanngitsut allat najugaqatigisariaqartarpaat, ilaat imerajuttuusarput allatulluunniit atornerluisuusarlutik.

Maannakkorpiarli qujanartumik eqqisisimasunik allanik angerlarsimaffeqanngitsunik  najugaqateqarput.

Arnap 42-nik ukiullip oqaluttuaraa sooq angerlarsimaffeqarunnaarsimallutik.

- 2004-mi 2005-milu angajoqqaakka tulleriiginnarmik toqukkut qimagupput. Suliffiga tamatuma kinguninngua aamma annaavara. Illutsinnut erngup aqqutai tulleriiaaginnarlutik qaartooqattaarput akiligassanik arlalinnik kinguneqartumik. Pisut ataatsikkut takkussuuttut artorsaataasullu pillugit suliarisimasuugukkit immaqa inuuninni taamatut naapitaqassanngikkaluarpunga, 42-nik ukiulik anaanaq taama oqaluttuarpoq.

Nunatsinni angerlarsimaffeqanngitsorpassuit, 42-nik ukiulittut ajornartorsiuteqarput. Isumasioqatigiinnermi aaqqissuussisut, Kalaallit Nunaannilu angerlasimaffeqanngitsut angerlarsimaffeqarsimanngitsullu pillugit paasiniaasut, Statens byggeforsikringsinstitut-i, SBi, Nunatsinni angerlarsimaffeqanngitsut arlallit oqaloqatigisareerpaat.

Paasisaasalu pingaarnerit ilagaat, inuunermi aqqusaakkat ajornartorsiutit arlaqartut pissutaallutik angerlarsimaffeeruttoqartartoq.

- Inuit angerlarsimaffeerutinnginnerminni suliffeqartarput pitsaasumillu inuuneqartaraluarlutik. Pissutsilli ajornartorsiuteqalernermut aallarniutaasartut arlaqarput, ilaasa suliffitsit annaasimasinnaasarpaat ilaasalu ilaqquttaminnik toqusoqarnera pissutigisarlugu. Ilaasa ajornartorsiutitik artulerlugit imigassamut saattarput, qanorlu ilerianngitsoq politiit angerlarsimaffiannut takkusinnaasarput oqarlutillu tassa akiliisimannginnavit maanngaanniit anisariaqarputit. Inuit toqqissisimasut inuunerminnillu ingerlatsilluartut arlallit ilisimasaqarfigaagut, ajornartoriutit arlallit pissutigalugit angerlarsimaffeeruttartut, SBi-meersoq ilisimatooq, Knud Erik Hansen taama oqarpoq.

Taassuma suli ilisimanngilaa inuit qasserpiaat Nunatsinni angerlarsimaffeqannginnersut, qassit utaqqiisaasumik inissinneqarsimanersut qassillu inissaqaratit pulaartuuginnarnersut.

Nunatsinni angerlasimaffeqanngitsut SBi-mit ikiorneqartussaanngillat, taakku taamaallaat suliassaraat ajornartorsiummut aaqqiissutissat paasisat suuneri naapertorlugit allaaserissallugit.

Kalaallit Nunaata ajornartorsiut namminneerluni aaqqitassarigaa, Knud Erik Hansenip oqaatigaa.

- Ajornartorsiut annertuvoq imaaliallaannarlu aaqqinneqarsinnaanani. Kalaallit Nunaata aaqqissuussaanerata iluani suut tamassumunnga akornutaanersut qanorlu aaqqinneqarsinnaanersut pillugit siunnersuuteqarnitsigut ikiuukkusuppugut. Tamatumalu kingorna Kalaallit Nunaanni oqartussat qanoq aaqqiiniarnerlutik namminneq aalajangissavaat, SBi-meersoq ilisimatooq Knud Erik Hansen taama oqarpoq.

Angerlasimaffeqanngitsut pillugit misissuinermit kisitsisit paasineqartut aappaagu aprilimi saqqummiunneqassapput.