Ilaqutariit illuannik pilersitsissapput

- Illumi tassani ilaqutariit sullinneqassapput, imaanngilaq ajornartorsiutillit kisimik sullinneqassasut, Qaasuitsup kommuniani pitsaaliuinermut immikkoortortaqarfimmi pisortaq Helga Nielsen oqarpoq.

Pisariaqartitat aallaavigalugit illup atorneqartarnissaa pilersaarutaasoq Helga Nielsenip  aamma oqaatigaa.

- Qaanaami sumiginnaasarneq annikillisarniarlugu ilaqutariit illuannik pilersinnissaanut maani misissuisimavugut, taavalu oqariartuutigineqarpoq, pisariaqartinneqartoq,Helga Nielsen oqarpoq, Taanna Qaanaami nunaqarfiinilu pitsaaliuinermut tunngasunik suliaqarpoq. Qaanaamiinnerminullu atatillugu Ilaqutariit illussaata inissaanik ujaasivoq. Ilaqutariit illuat ikorfartuiviussaaq tamanit atorluarneqarsinnaasussaq.

- Tassani ilaqutariit sullinneqassapput, imaanngilaq ajornartorsiutillit kisimik sullinneqassasut. Aamma tassani sullinneqassaput, inuttut sakkussanik aallerfissatut, assersuutigalugu ikkussuussinnaavagut suliffissaaleqisut. Taava tassani inuttut ineriartornissamut pikkorissarneqarsinnaallutik. Taava aamma inuusuttut ingerlariaqqinnissaannut ikorfartorneqartarnissaannut ingerlasussatut, Helga Nielsen oqarpoq.

Ilaqutariit illuat unnukkut meeqqanut inuusuttuaqqanullu 18-it inorlugit ukiulinnut saaffigineqarsinnaasutut unnuiffigineqarsinnaasutullu aamma atorneqartassaaq.

Qaanaami inunnik isumaginnittoqarfimmi sulisuni, ataaseq inunnik isumaginninnermut ilinniarsimavoq sinnerilu socialhjælperitut ilinniarsimallutik. Taakkua inunnik sullissiniarnerat arriitsumik ingerlasinnaasarmat, ilaqutariit illuat pisariaqartinneqarpoq. Ilaqutariinnut illussaq pilersinnissaannut aningaasat aamma sulisut akissarsiaqartinneqarnissaanut aningaasat amigaatigineqarput.

- Taava fondinut  assigiinngitsunut qinnuteqarnikkut aningaasat 1,2 imaluunniit 4 millionit missaanniittut nassaariniassavagut, Helga Nielsen oqarpoq.