Qaqortoq Ilaqutariit ikiorneqartut

Qaqortumi sapaammi ullaassakkut ikuallarujussuartoqarpoq. Inunnik ajoqusertoqanngitsoq, politiit oqarput.

Qaqortumi inissiami blok J-imi ikuallattoqarnera politiinut qatserisartunullu decembarip 24-ani ullaassakkut 04:45 kalerriutigineqarpoq.

Quleriillu qullersaata ilaa ikuallassimavoq, najugaqartullu katillugit 19-it inissiamit qimagutitinneqartut, Kommune Kujallermi isumaginninnermut pisortaagallartoq oqarpoq:

- Peqqinnissaqarfiup politiillu ilisimatippaatigut ilaqutariit inuunerminnik ulorianartorsiunngitsut, Nielsine Petersen oqarpoq.

AAMMA ATUARUK Qaqortumi ikuallattoqarnerani ilaqutariippassuit qimagutitinneqartut

Qimagutitinneqartut inissiani attartortakkani maanna najugaqarallarput.

- GFS suleqatigalugu eqqiaaneq ingerlanneqaqqaassaaq. Taamaammat ilaqutariit amerlanerit juullip kingorna angerlaqqissasut, ilisimatinneqarpugut. Kisianni inini ajoqusivissortuni najugallit inissiani attartortakkani sivisunerusumik najugaqarallassapput.

Qimagutitinneqartunillu ikiuuttoqaqisoq, pisortaagallartoq oqarpoq. 

- Lions Clubip eqqugaasut juullerpaluttunik nerisassanillu pajuttornikuuai. Taavalu aamma inissianik attartortakkanik piginnittoq ilaqutariinnik Lal'laatimi unnummut nerisitsissaaq.

Pisiffik atortunik amigaatigineqartunik, soorlu qipinik, attartortitsisoq, isumaginninnermut pisortaagallartup ilanngullugu oqaatigaa.

Inissiamik ikuallatsitsisimasutut pasineqartoq eqqartuussisumut matumi matoqqasumi sassartinneqarpoq, ullullu 27-t tigummigallarneqassasoq, Kalaallit Nunaanni politiit tusagassiuutinut nalunaarutigeqqammerpaat.