Ilaqutariit hashimik iioraapput - ataaseq napparluni
Hashit misisukkaarlugit poortorlugit iisat taama isikkoqartarput. Asseq toqqorsivimmit.
Politiit qimmiat ikiaroornartulerisartoq narajuitilluni inuit pingasut pasinarsisippai.
- Napparsimmavimmi misissorneqarneranni paasinarsivoq "aqajarormiorisassarinngisaminnik" tamarmik iioraasimasut. Danmarkimit aallartinnatik iiorarsimagaat paasivarput, Niels Nyvang, Nuup Politeeqarfiani aqutsisoq ilisimatitsivoq.
Isertitsisarfimmiinnerminni inuit pineqartut anarsaatitortinneqarput, anisussat aninissaasa tungaanut.
Angut iiorakkatik katillugit hashit poortat 200 grammiusut anarereermatigik arfininngornermi iperarpavut.
Arnarli tallimanngornerup arfininngornerullu akornani naarluttorujussuanngorpoq Dronning Ingridip Napparsimmavissuanut - politiinut nakkutigineqartuarluni unitsinneqartariaqalerluni.
- Iiorakkani ataasinngornermi suli anarinngimmagit nakorsat aalajangerput pilanniarlugu, pilanneqanngikkuni hashit puui aserorsinnaammata arnallu inuunera suli ulorianartorsiornerulersissinnaallugu, Niels Nyvang oqarpoq.
Politiit mianersoqqusipput
Oqaatigineqarpoq hashi aqajarormioralugu anngiortumik eqquteriarlugu inuunermut navianartorujussuusoq, aamma qimmip ikiaroornartunik narajullaqqissup ingerlaannaq naamasinnaagaa.
- Taamaammat iioraalluni eqqusseriarnissaq sakkortunerpaamik inassutigerusunnartinngilaat, Niels Nyvang naggasiivoq.
Hashimik eqqusseriartut tamarmik ilaqutariipput angalaqatigiittuullutillu.