Ilaqutariit atugaat Paamiuni pitsanngorsarnialerpaat
Siunertat aamma ilagaat, innuttaasut ukiutik apeqqutaatinnagit pinnguaqataanissamut, misigisaqaqatigiinnissamut, eqqarsaqatigiinnissamut, misigissutsinik atueqatigiinnissamut suleqataanissamullu piumassuseqalernissaq ilinniarumalissagaat. Taama angusaqartoqarpat anguneqassammata ilaqutariit ingerlalluartut, taakku suliffeqarfinnik ingerlalluartunik tunngavileeqataassammata.
Thiiooq Knudsen, Inunnik Isumaginninnermi ataatsimiititaliap siulittaasua ima oqarpoq.
-Ilaqutariit nukittuut angussagutsigit ilaqutariit angerlarsimaffeqartariaqarput, tassani aatsaat ilaqutariittut nukittuutut pilersikkiartussapput tarnimikkut eqqissillutik angerlarsimaffitsik pilersikkiartussavaat. Imminnut ikorfartoqatigiillutik ingerlagunik aatsaat taakku angulluarsinnaavaat.
Blokkersuit ilaat ataaseq piiarsimavarsi taava qanoq ittunik sanassavisi?
Illunik ataasiakkaaginnarnik sanaartorlutik aallartinnikuupput, kisianni kommunalbestyrelsimi isumaqatigiinnikuuvugut annerpaamik qulereeqassasut marlunnik, allamik naamik.
Siunertassi ilagaat ilaqutariinnut siunnersuisarfimmik ammaanissarsi, taannalu ammareerpoq, kikkunuku tassani pineqartut, ilaqutariit tamarmik pineqarpat.
Aap, tassa familiecenter ungasinngitsukkut pilersinneqarpoq, tassani pineqarput ilaqutariinnik sanngiitsunik taasartakkavut, imaappoq anaananngujuaarsimasut aammalu imerajuttunik taaneqarsinnaasut. Imigassamik aammalu ikiaroornartumik ussernartorsiorsinnaasut, taavalu perorsaanikkut siunnersorneqartariaqartut. Piorsarneqassapput angajoqqaanngujaartartutut oqaatigineqartartut. Soorlu maanni kommunimi pigivagut anaananngujaarsimasut aammalu suliffeqanngitsut, tamakkuupput siunertamut tassunga isertillugit piorsarneqartussat.
Thiiooq Knudsen, Paamiut Kommuniani Inunnik Isumaginninnermi ataatsimiititaliami siulittaasoq taama oqarpoq.
Paamiut Kommuniat Kalaallit Nunaani siullersaalluni meeqqat ilaqutariillu salliutillugit siunertaqarluni aallartippoq, taama allappoq borgmester Lars Sørensen.
