Ilaqutariinnut inissianik sanaartortoqassaaq
Naalakkersuisut inissialiortiternerit pillugit anguniagaat 2011-mut aningaasanut inatsisip akuerneqarneratigut inissianik amigaateqarfiuvissuni sanaartortitsinerit aallartinneqassapput.
2014 tikillugu sanaartortoqassasoq pilersaarutigineqarpoq.
Sanaartortitsinerit 230 millioni koruuninik akeqartussat illoqarfiit anginerit sisamat avataanni sanaartorneqassapput nutarterneqarnerallu aaqqissuulluakkamik ingerlanneqassasoq, Ineqarnermut naalakkersuisup Jens B. Frederiksenip oqaatigaa.
- Allaffeqarfiga ilaqutariinnut illunik, kinguaariit arlallit illumi ataatsimi najugaqarfigisinnaasaannik ineriartortitsinermik aallartitseqqullugu piumaffigeqqammerpara, Ineqarnermut Naalakkersuisoq Jens B. Frederiksen oqarpoq, nangillunilu:
- Ilaqutariinnut illut immikkoorutigaat sisamanik inissiartaqartussaagamik, illumi ataatsimi inissiat marlunnik initallit marluk, inissiaq pingasunik initalik ataaseq aammalu inissiaq sisamanik initalik ataaseq sanaartorneqarsinnaallutik. Illumi ataatsimi sisamanik inissiartalimmi angajoqqaat, taakkua meeraat aataakkullu najugaqarsinnaassapput, Jens B. Frederiksen oqarpoq.
Ilaqutariinnut illumi ineqarnermut aningaasartuutissat inissiat angissusaat malillugit nikerartillugit naleqqussarneqarsinnaassapput. Aamma ilaqutariinnut illuni kinguaariit utoqqartaasa sivisunerpaamik namminneq angerlarsimaffimminniiginnarnissamik kissaateqarnerat ikorfartorneqassaaq, taamatullu ilaqutariit inuusuttut meerartallit aataakkut aanaakkullu qanillugit najugaqarsinnaassasut pilersaarummi anguniarneqarpoq.
