Ilaqutariinnik sullissisut isumasioqatigiinnerat iluaqutaassaaq

Ilaqutariinnik meeqqanillu sullissisut akimorlutik suleqatigiinnerat pitsanngorsarniarlugu isumasioqatigiissitsineq, Ilaqutariinnermut Peqqissutsimullu Naalakkersuisup, Asii Chemnitz Narupip isumassarsiffigilluarsimanerarpaa.

Siunnersuutigineqartut ilaat ilaqutariinnik sullissivik ataasiinnanngortinneqassasoq, tassalu ilaqutariittut ikiorneqarnissamik pisariaqartitsinermi ornitassaq ataasiinnaassasoq, Asii Chemnitz Narupip isumassarsiatsialaanerarpaa. Pisortaqarfinniit pisortaqarfinnut innersuunneqaqattaarnermi ilaatigut  ajornartorsiutit iliuuseqarfigineqanngitsoorsinnaasarnerat oqaatigalugu.

- Tamanna pinngitsoorniarlugu siunnersuut assorujussuaq soqutiginartippara. Suleqatigiissitat ilaasa erngertumik taama ingerlatsilernissaq soqutigigaluaraat nalunngilara, aamma  pisortaninngaanniit aningaasaliisoqarnissaa utaqqinagu, aningaasaateqarfinnit aningaasalersukkamik misileraassallutik kajumissuseqarput. Neriorsuutigisinnaanngilara qanoq iliorluta aammalu piviusunngortissinnaanerlugu, kisianni misissugassatta ilagissavaat. 

Ilaqutariit imminnut napatissinnaanngitsut amerlavallaarnersut aperineqarami, ilaqutariinnermut peqqissutsimullu naalakkersuisoq ima akivoq:

- Suliffissaqartitsiniarnikkut ilinniartitaanikkullu periarfissat aqqutigalugit, ilaqutariit inuillu amerlanerusut imminnut napatilernissaminnut periarfissinneqassapput. Ilaqutaariinnik sullissineq nutaanngorsarneqartariaqarpoq, sapinngisamik  sukkanerusumik imminnut napatissinnaangornissaat anguniarlugu.

Ilaqutariit ikioqqullutik saaffiginnittut siunissami pilertortumik eqaatsumillu, aamma peqatigeqqissaarlugit ataqqillugillu sullinneqarnissaasa qulakkeerneqarnissaat, Ilaqutariinnermut Peqqissutsimullu Naalakkersuisup takorloorpaa.

Innuttaasut amerlassusaannut sanilliullugu, suliat eqaannerusumik suliarineqarsinnaanerigaluinut qitiusumik allaffissorpallaarnerup arriillisaataasarnera Asii Chemnitz Narupip aamma tikkuarpaa.