Ilaqutariinni persuttaasarneq pinaveersaartinneqarsinnaavoq

Ilaqutariinni persuttaasarneq pinaveersaartinniarlugu Canadap illoqarfiisa ilaanni, Albertami, sapaatip akunnera una isumasioqatigiittoqarpoq.

Meeqqat Inuusuttullu pillugit ilisimatusarfimmeersup, Nina Banerjee-p, nunanit assigiinngitsunit 30-init inuit 1000-it missaat, isumasioqatigiinnermi naapisimaarpai.

Isumasioqatigiinnermi oqariartuutit pingaarnerit pingasut taavai:

- Ilaqutariinni persuttaasarneq tamanut ajoqutaasarpoq. Inuiaqatigiinnut akisoorujussuusarpoq kiisalu inunnik artukkiisarpoq.

Aamma ilaqutariinni persuttaasarneq nunarsuarmi tamani ajornartorsiutaavoq.

Kiisalu ilaqutariinni persuttaasarneq pinaveersaartinneqarsinnaavoq, tamanna inatsisiliorneq aqqutigalugu pinaveersaartinneqarsinnaalluni, Nina Banerjee oqarpoq.

Ilaqutariinni persuttaasarneq nutaamik inatsisisiliornikkut akuerineqarsinnaanngitsoq nunani 45-ni aalajangersaaffigineqarpoq.

Persuttaasarneq paquminartutut isigineqassanngilaq pinngitsoorani aamma iliuuseqarfigineqartussaalluni.

- Ilaqutariinni persuttaasarneq ukiut qulikkaat kingulliit nunarsuarmi tamarmi eqqartorneqanngisaannarpoq paqumigineqarluni. Massakkulli nunarsuarmi nunanilu ataasiakkaani suliniaqatigiiffiit inuillu ataasiakkaat kattullutik ilaqutariinni persuttaasarnermik pinaveersaartitsipput, Nina Banerjee oqarpoq.

Ilaqutariinni persuttaasarneq inuit nalinginnaasut aamma isummersorfigisinnaavaat.

- Australiami tujuuluaqqat pinaveersaartitsinermik allagartallit atorneqarput. Kenyami persuttaasoqarsimatillugu inuit ataatsimoorlutik persuttaasoq apersortarpaat. Persuttaasoq persuttaanani allaanerusumik iliuuseqarsinnaanersoq paasiniaaffigisinnarlugu ilaqutariit arlaatigut ikiorneqarsinnaanersut peqatigalugit aalajangiisoqartarpoq, Nina Banerjee oqaluttuarpoq.

Canadami isumasioqatigiineq pillugu Nina Banerjeep nalunaarusiaa MIPI-p nittartagaani qanittukkut atuarneqarsinnaalissaaq.