Ilaqutariinni ataqqinassuseq pigiinnarniarlugu toqutsinermi pineqaatissiisoqarpoq
Danmarkimi ilaqutariittut ataqqinassuseq pigiinnarniarlugu toqutsinermi pineqaatissinneqartut qulingiluaasut ilaat arfineq-pingasut parnaarussivimmiinnissaat sivisusussaassagunarpoq.
Østre Landsret-imi ullumi aalajangerneqarpoq pineqaatissinneqartut arfineq-pingasut sivikinnerpaamik ukiuni tallimani parnaarussassanngortinneqassasut.
Eqqartuunneqartut qulingiluat eqqartuussivimmi aalajangersaaqataasunit 18-nik ukiulimmik Ghazala Kahn-imik toqutsisimasutut uianullu toqutseriarsimasutut ullumi pisuutinneqarput.
Siorna septembarip 23-iani Ghazala Kahn aqqalussaminik aallaaneqarluni toqutaavoq. Aappariit sapaatit akunnerini arlalinni malersorneqarlutik ujaarineqarsimapput, toqunneqarnissaallu aamma piareersarneqarsimalluni. Eqqartuunneqartut qulingiluat, toqutaasup ilaqutai arfinillit ikinngutaallu pingasut, tamarmik Pakistaniminngaaneersuupput, toqutsinermilu immikkut inissisimanerat apeqqutaalluni pineqaatissinneqarlutik.
Eqqartuussineq immikkuullarissutut isigineqarpoq. Oqaluttuarisaanermi siullerpaamik ilaqutariittut ataqqinassuseq pigiinnarniarlugu toqutsinermi pisooqataasut ilanngullugit pineqaatissiisoqarpoq.
Pineqaatissiinerit qanoq sivisutiginissaat Østre Landsret-imit aqagu tusarliunneqassapput. Naatsorsuutigineqarpoq pineqaatissiinerit eqqartuussiviit qullersaannut suliareqqitassanngortinneqassasut, toqutsinermili pisuutitaaneq suliareqqitassanngortinneqarsinnnanngilaq.
