VIDEO Ilannguaq Lumholtip saqqummersitaa takuuk

Ilannguaq "ILANG" Lumholtip nipilersornerup silarsuaani danskit nipilersortartui tusaamasarpassuit suleqatigisarpai maannalu Miss Daisy aatsaat siullerpaamik saqqummersillugu.

Amerikami Los Angeles aasarisseruttornerani "Miss Daisy" videoliaralugu immiunneqarpoq.

Erinarsuullu filmilimit "Driving Miss Daisy"-mit aallaaveqartoq, nipilersortartoq Ilannguaq "ILANG" Lumholt 38-nik ukiulik oqaluttuarpoq.

Miss Daisy tassaavoq arnaq kisimiittoq utoqqasaaq immikkut biilertulik. Miss Daisy inuuvoq uteriitsoq qungujussaqarpallaanngitsorlu, tamatigut biiliutsikkaangami tunorlermi issiasartoq - tamannalu musik videoliami takutinniarneqarpoq.

Ilannguaq "ILANG" Lumholt IT-lerinermik ilinniagartuujuvoq nipilersornerli qimavissinnaasimanngilaa maannalu nipilersortartunik tusaamasanik ilaatigut Medina Rasmus Seebach allallu suleqartigisarlugit.

Ilannguaq "ILANG" Lumholt qatanngutigiinni nukarlersaasoq ilaquttamini Lumholtikkunni nipilersornermik aallutaqarluartunit perortoq tusarnaartitsinissamut tunuarsimaannginnerarpoq:

- Qilanaarpunga uteqqinnissannut neriuppunga aamma nipilersoriarfigisinnaassallusi, Ilannguaq "ILANG" Lumholt KNR-imut oqarpoq.

Aana musik video tamakkerlugu: