Ilannguaq Sanimuinnaq suliniummi Qamanimi peqataasoqAssi: KNR

Ilannguaq imminut toqunneq akiorniarlugu filmimi ilaavoq: Kiisami tusaaneqalerpugut

Filmiliaq "Qamani" inuusuttut imminut toqunnermut pinaveersaartitsinissamik oqariartuutaanik imalik ataasinngornermi takuteqqaarneqarpoq.

Suliniut Qamani ataasinngornerup unnukkuani takuteqqaarneqarmat, Isilernermi kakkissarfinnik piareersimatitsisoqarpoq. Peqataasut amerlasuut misigissusaat attorneqarput.

Ole Nathanielsen

- Imminut toqukkusulerneq nalunaaqutaqanngilaq, nakkaqqarujussualerneq nalunaaqutaqanngilaq, taamaammat maannakkut Tusaanngakkut nalunaaqutalersorneri taakkua ulloq unnuarmut anguneqarnissaat kissaatiginarpoq, Ole Nathanielsen KNR-imut oqarpoq.

Katuami ataasinngornerup unnukkuani ilaatigut taama oqariartuuteqartoqarpoq.

2021-mi imminut toqussimasut imminullu toqoriaraluarsimasut amerlassusaat                                               
Nunatsinni 2021-mi imminut toqussimasut 49-pput, 2020-milu 41-llutik. Tassa imminut toqussimasut ukiuni kingullerni tallimani ikiliartoratik amerliartuaarusaarsimapput.

Siornalu imminut toqoriaraluarsimasutut nalunaarsorneqartut 90-iupput. Tassa imminut toqoriaraluarsimasut ukiuni kingullerni tallimani amerliartoratik ikiliartuaarsimapput.

2021-milu imminut toqunnissamik sioorasaarisimasutut nalunaarsorneqartut 1309-upput. Tassa 2017-imiilli amerleriangaatsiarsimapput, 2017-imimi imminut toqunnissamik sioorasaarisimasutut nalunaarsorneqartut 832-upput.

Kisitsisit qulaani saqqummiussat politiinut nalunaarutiginninnernik tunngaveqarput. Tassa taakku nalunaarsorneqarsimasunit amerlanerusut ilimagineqarpoq.

Tusarfik: Kalaallit Nunaanni Politiit ukiumoortumik 2021-mi nalunaarsugaat

Qamani siullermeerluni takutinneqarmat siunnersuutigineqartut isumaqatigineqarput.

-  Inuusuttut saqqummiussaat siunnersuutigineqartut arlalitsigut taakku isumaqatiginaqaat. Soorlu oqariartuutigivaat amerlasuut, saaffissat ajornarneri nunatsinni, taanna ajornartorsiutigigaat paasinarpoq, Ole Nathanielsen KNR-imut oqarpoq.

MIO-p naluaarusiaa naapertorlugu 2021-mi 49-t imminut toqussimapput, taamaammat saqqummiussisoqarnera pingaaruteqartoq Ole Nathanielsen isumaqarpoq.

- Tassa isumaqarpunga pingaarutilerujuusoq, imminut toqunneq nunatsinni annertoorujussuuvoq, inuppassuit immaqa tamatta eqqugaanikuuvugut tassunga.

Ole Nathanielsen siunnersuutigineqartut ilaat isumaqatigalugu oqarpoq.

- Siunnersuutigerusunnarpoq aamma uku inuusuttut nammineq oqariartuutigereerpaat, soorlu saaffissat ersarinnerusut, ajornartorsiulerunik sumut saaffiginnissappat, taavalu ulloq unnuarlu saaffigisinnaasaat.

- Arlaata aamma oqaatigivaa, imminut toqukkusulerneq nalunaaqutaqanngilaq, nakkaqqarujussualerneq nalunaaqutaqanngilaq, taamaammat maannakkut Tusaanngakkut nalunaaqutalersorneri taakkua ulloq unnuarmut anguneqarnissaat kissaatiginarpoq, Ole Nathanielsen oqarpoq.

Kaffi, kaagit kakkissarfiillu

Suliniut Qamani ingerlannerani nunatsinneersut inuusuttut 14-init 25-nut ukiullit 35-it  peqataapput. Taakkulu misigisatik amigaatitillu oqariartuutigaat, inuusuttoq peqataasoq Ilannguaq Sanimuinnaq tusaaneqartutut misigigami nuannaaqaaq.

Ilannguaq Sanimiunnaq

 

- Ingerlalluartutut taasinnaavara, malugisinnaavara naalakkersuisunit politikerinillu tusarnaarluarneqarluta. Nuanneqaaq angusaqarluarnaqaaq, Ilannguaq Sanimuinnaq KNR-imut oqarpoq.

Qamanimi inuusuttut 40-nik siunnersuuteqarput, namminerlu misigisimasatik ilaatigut aamma oqaluttuaraat.

- Uannut isumaqaqaaq, aamma nammineq misigisakka ilaagamik, tusarnaarneqannginneq tusarliukkatsigu tassani filmimi. Taava naalakkersuisut politikkulluunniit oqartussallu, neriuppunga aatsaat iluamik tusaalissagaatigut oqariartuutigigini, Ilannguaq Sanimuinnaq oqarpoq.

Ikiortariaqarpit? 

 

Imminut toqunnissamik eqqarsaateqaruit kisimiittutulluunniit misigiguit, Tusaanngamut 801180-imut sianerlutit 1899-imulluunniit sms-erlutit saaffiginnissinnaavutit. 

 

Tusaanngamut sianerneq sms-ernerluunniit akeqanngilaq, kinaanerlu taasariaqarani.

 

Tusaannga pillugu uani paasisaqarnerusinnaavutit.

Suliniut Qamani 2023-mi naammassisimanissaa naatsorsuutigineqarpoq, Ilannguaq Sanimuinnaq politikkikkut ikiorneqarluarnissaminnik neriuuteqarluni KNR-mut oqaluttuarpoq.

- Neriuuteqarujussuarpunga siunissami inuusuttunngortussat neriuutigeqaakka ajunngitsumik ingerlalluassasut, politikkikkut ikiorluarneqarlutik arlaannilluunniit.

Suliaq iluatsilluartoq

Meeqqat oqaaseqartartuat Aviaaja Egede Lynge isumaqarpoq suliaq iluatsilluarsimasoq.

- Inuit peqataasut politikerit innuttaasullu tamarmik inuusuttut oqariartuutaanik tusaasaqarnissatsinnik tigusilluarput. Taamaammat isumaqarpunga inuusuttut tusarneqarmata, tusaaniarneqarmatalu isumaqarpunga suliaq iluatsilluartoq.

Aviaja Egede Lynge

 

Aviaja Egede Lyngep inuusuttut kissaataannik suliallu aallatinnissaanik neriuuteqaqaluni KNR-imut oqarpoq.

Nalunaarusiamit Qamanimit innersuussutit (qinertuaakkat): Ikiorneqarnissaq ajornaannerusoq
 

- Imminut toqunnissamik aarlerinartorsiortunut qimagaasunullu sukkanerusumik ajornaannerusumillu ikiuineq

- Qanimut isigalugu immikkut ilisimasalimmik, tarnip pissusianik ilisimasalimmik allanillu oqaloqateqarneq

- Imminut toqunnissamik eqqarsaateqartunik inunnillu aliasuttunik oqaloqateqarnissamut sakkussat

- Oqarasuaatip Tusaanngap ulloq unnuarlu ammasarnissaa

- Neriuutigilluinnarpara filmi saqqummersoq, taavalu nalunaarusiartaa tassaneereerpoq inuusuttut oqariartuutaa qanoq iliortoqarsinnaaneranik, qanoq kissaateqarnerlutik isumaqarpunga taakku malillugit suliaq aallartilerpoq, Aviaja Egede Lynge oqarpoq.

-Tusaalluartariaqarpagut inuiaqatigiinni politikkikkullu. Taamaammat isumaqarpunga alloriarnerujussuusoq, eqqartuinnarnagit kisianni aallaavigalugit peqatigalugit alloriarneq.

 



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl