Sulisitsisut: Ilanngaassivik pillugu siunnersuut peersiuk

Innuttaasut pisortanut akiitsuisa akilerneqarnissaat akiliisarfiup Ilanngaassiviup qularnaarsinnaavaa, innutaasulli namminersortunut akiligassaminnut akissaarussinnaapput. Taamaattumik siunnersuut peertariaqarpoq, Sulisitsisut - Grønlands Erhverv nalunaarput.

Naalakkersuisut Ilanngaassivik pillugu tusarniutigineqarmat Sulisitsisunit isumaqatigineqanngilluinnarpoq.

Akiligassanik akiliisitsiniarnermi innuttaasut namminersortunut akiligassaat tunorlinngortinneqassasut Sulisitsisut isumaqarput.

Namminersortut aningaasanik pisassallit akilerneqaqqaarnavianngillat, akiliisarfiup Ilanngaassiviup innuttaasut pisortanut akiligassaat salliutissammagit. Taamaassappat namminersortunut aningaasaminniinnannguit sinnerutissapput, Sulisitsisut isumaqarpoq.

Sulisitsisuni Siunnersortip Lars Krogsgaard-Jensenip Ilanngaassivik naalagaaniartutut taavaa, namminersortullu sinnerlugit ernumalluni.

- Uanga takusinnaasannik, ilaasortatta ilaasa akiligassaqarfigineqartut aningaasanik pissarsinngitsoornissaat aarlerinartuuvoq, innuttaasummi pisortanut akiitsuinut aningaasat pisortat tillereermatigit, Lars Krogsgaard-Jensen oqarpoq.

Siunnersuummiit
  • Innuttaasut akiligassanik akiliisitsisarnermi pineqartunut ilaasut, pisortanit akiligassiinerit atuuttut akilinngitsoornissaannut periarfissaqassanngillat. Ataasiakkaat isertitamik siunertanut allanut atornissaannut periarfissaqarnerat annikillisinneqassaaq.
  • Siunnersuutip malitsigisaanik innuttaasut isertitaat Ilanngaassivik aqqutigalugu tunniunneqartassapput aammalu pisortat akiligassiissutaat innuttaasup aningaasarsiaanit akilersinneqartassallutik. Innuttaasut akiligassaqarfinnut allanut, assersuutigalugu namminersortut akiligassiissutaannut akiitsunullu akiliinissamut periarfissaasa, ajornerulernerannik, taamaalilluni siunnersuut toqqaannanngitsumik malitseqarsinnaavoq.
  • Namminersortut pisassarisaat, innuttaasup akiligassai, soorlu oqarasuaammut angallattakkamut pisartagaqarneq, sillimmasiissutit, aningaaserivimmilu taarsigassarsiat Ilanngaassivik aqqutigalugu akilersinniarneqarsinnaanngillat. Aamma namminersortunut inissianik attartortitsisartunut aningaasartuutinut tamanna atuuppoq.

 

Tigusiffik: Namminersorlutik Oqartussat

Aningaasaqarnikkut siuariarnissaq akornuserpaa

Ilanngaassiviup kingunerissappagu suliffeqarfinnut akiligassat innuttaasunit akilerneqannginnerat nunap aningaasaqarniarneranut Ilanngaassivik ajoqutaassasoq Sulisitsisut - Grønlands Erhverv isumaqarput:

- Taava soorunami suliffiit ingerlatsineri aningaasaliisinnaanerilu kigaalaqusersussavai. Taamaassappat siunissaq ungasinnerusoq isigalugu namminersortut akiitsoqarfigineqartut tamarmik eqqugaassappata, taava tamatuma nunatta aningaasaqarnikkut siuariarnera aamma kigaalaqusersussavaa, Lars Krogsgaard-Jensen oqarpoq.

Taamaammat Sulisitsisut isumaqarput Naalakkersuisut Kujataanut qiviartariaqartut. Kommuni Kujallermi ineqarnermut akiliutissat akilinngitsuukkat ikilisinneqarsimapput, siunnersuinermik neqeroorfigineqarneq peqqutaalluni.

Siunnersuineq taamaattoq nunap sinneranut atuutsinneqalertariaqarpoq taamaalillunilu innuttaasut ataasiakkaat ikiorneqarnissamik pisariaqartitsisut akiliisinnaanerat akiliiumanerallu pitsanngorsarneqassalluni.

Aningaaserivik ernummateqarpoq

Aamma Grønlandsbanken tusarniaanermut akissuteqaammini namminersortut akiligassaqarfiusut pillugit ernummateqarpoq. Umiatsiaararsortut aalisakkanik tunisinerminni aningaasarsiaat isertitaasa pingaarnersarigaat aningaaseriviup ilaatigut uparuarpaa.   

- Aalisartut aningaasanik kaaviiartitsinerat ilanngarneqassappat taava assersuutigalguu umiatsiaararsortunut aningaasanik atukkiisinnaanissaq pilerinarunnaarnerungaatsiassaaq, Grønlandsbanken tusarniaanermut akissummini allappoq.

Aningaasaqarnermut Naalakkersuisoq Vittus Qujaukitsoq (NQ) siusinnerusukkut Sermitsiaq.ag-mut oqarpoq, Naalakkersuisut aggustimi isummissasut Ilanngaassivik pillugu siunnersuut ukiaanerani ataatsimiinnermut saqqummiunneqassanersoq. 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat