Ilagiit naalakkersuisumit aqunneqarunnaarnissaat biskoppip taperserpaa

- Ilaageqarnerup allaffissornikkut ulluinnarni ingerlanneqarnerat Naalakkersuisoqarfiup ullumikkut tigummivaa. Tamannartaalu ilagiinnit annertunerusumik tigussagipput paasivara. Kisianni soorunami Naalagaaffimmut atasuugatta, taava naalakkersuisoqarfimmi sulisoqartariaqassaaq, Sofie Petersen oqarpoq.

Tassalu Ilagiinni ulluinnarni ingerlatsineq ilagiinnik namminernit akisussaaffigineqalissasoq, illuanillu naalakkersuisoqarfik inatsisiliornermik annerusumik ingerlatsilissasoq, biskopip ilimagaa.

Ilagiit namminiilerunik aamma Nunani allanisulli imminnut aningaasalersulernissaat ilimagineqarsinnaavoq. Kisiannili Sofie Petersen taama neriunngilaq.

- Takorloorpara, massakkutuut Nunatta Karsianit aningaasaliissutit ingerlaannassasut. Taamaanngippammi akileaartarnikkut allannguisoqartariaqassaaq, ilagiinnut immikkut akileraaruteqalerluni, nunatta biskoppia oqarpoq.

Tassalu Naalakkersuisut siulittaasuata, Kuupik Kleistip ukiortaami oqaasii, Biskoppip takorluugaanut naapertuupput.

- Taamatut ipput. Kisianni oqaloqatigiilluarnissaq pisariaqarpoq. Ilagiit naalakkersuinermit avissartinneqarnissaat pineqarpoq. Danskit folkekirkeat aamma naalakkersuinermut avissaartinneqarani atavoq, naak akileraarnikkut immikkut aaqqissuisoqarnikuugaluartoq, biskop Sofie Petersen oqarpoq.

Kisianni aningaasaliissutigineqartartut ingerlaannassasut neriuppunga, taamaangippat immikkut akileraarusiisoqartariaqalissammat, Sofie Petersen ullumi oqarpoq.