Ilagiit kalaallit namminersulivinnissaat naalakkersuinikkut siunertarineqanngilaq
-Inatsisissami nutaami naqissuserneqassaaq, Kalaallit Nunaanni ilagiit naalagaaffeqatigiinnerup iluani ilagiiusut. Namminersorlutik oqartussat ataani inissisimasut, taakkunanngalu tapersersorneqartut, naalakkersuisoq Mimi Karlsen oqarpoq.
Ilagiit kalaallit siunissaat pillugu Biskop Sofie Petersen isummersornermini ilagiit savalimmiut assersuutigai. Taakku naalagaaffeqatigiinnerup ilagiivinit 2007 avissaarlutik namminersulivipput. Namminersulivinnerallu eqqarsaatigilluangaanngitsoq, Biskop Sofie Petersen isumaqarpoq. Naalakkersuinikkut ilagiit Kalaallit siunissami namminersulivissanersut Biskop Sofie Petersenip apeqqutigaa, tamannalu siunertarineqanngitsoq Naalakkersuisoq Mimi Karlsen oqarpoq.
- Taama nunatsinni pilersaaruteqanngilagut. Tassa Savalimmiuni ilageeqarnerup tungaatigut aalajangiussaat malinnianngilarput aamma taamatut eqqarsaateqanngilagut, Naalakkersuisoq Mimi Karlsen oqarpoq.
Ilagiit kalaallit pillugit inatsisissaq maanna itinerusumik nassuiaateqarfigisinnaanagu Naalakkersuisoq Mimi Karlsen oqarpoq. Inatsisissatut siunnersuut maanna suliarineqarpoq tusarniaassutigineqangajalerlunilu.