Ilagiit kalaallit naalagaaffeqatigiinnermi ataannarnissaa quarsaarutigineqarpoq

Naalagaaffeqatigiinnermi iluaqutigineqartut annaaneqassappata, ilagiit kalaallit upperisarsioqatigiinnik allanik suleqateqalersinnaasut, namminersorluni anersaakkut sullissisoq Markus E. Olsen oqarpoq.

Namminersonerup atuutilernerata kingunerisaanik ilagiit kalaallit pillugit inatsisiliornissamik periarfissaqalerput. Biskoppip Sofie Petersenip ilagiit kalaallit naalagaaffeqatigiinnerup ilagiivinut ataannarnissaat kissaatigivaa. Naalakkersuisup Mimi Karlsenip ilagiit kalaallit pillugit inatsisiliornermi naalagaaffeqatigiinnerup ilagiivinut ataannarnissaq siunertaraa. Tamannalu namminersorluni anersaakkut sullissisup Markus E. Olsenip quarsaarutigalugu qisuariarfigaa.

Kalaallit Nunaat namminersulivikkiartorpoq, tamannalu anersaakkut aamma piumaffigisinnaasariaqarpoq, Markus E Olsen oqarpoq. Ilagiit kalaallit Naalagaaffeqatigiinnerup ilagiivinut atanerminni silarsuarmi siunnersuisoqatigiiffinnut, lutherikkormiut kattuffiannut silarsuarmilu suliniaqatigiiffinnut assigiinngitsunut ilaasortaapput, tamakkualu iluaqutaasut Biskop Sofie Petersen oqarpoq, tamannali Markus E. Olsenimit allatut isumaqarfigineqarpoq. "Lutherikkuunerput aporfigivallaartariaqanngilarput, katuullit Befrielsesteologimik ingerlatsisut, aammalu allat suugaluarnersunik upperisarsiornermik ingerlatsisut suleqatiserisariaqarpagut" Markus E. Olsen oqarpoq. Savalimmiormiut ilagiivi naalagaaffeqatigiinnerup ilagiivinit avissaarlutik namminersulivinnerat eqqarsaatigilluangaanngitsutut Biskop Sofie Petersenimit isumaqarfigineqarpoq. Tamannalu aamma Markus E. Olsenip taamatut naliliisoqarsinnaasorigaluarlugu nalilersuisinnaasoqarsoraa.

Namminersornerulluni Oqartussaaneq aamma Namminersorneq pillugu taasisistsisoqarmat isumaqataasoqarpoq aamma akerlilersuisoqarpoq. Iluaqutigisinnaasagut atussavavut iluaqutigisinnaanngisavullu atornagit Markus E Olsen oqarpoq.