Ilagiinni sulisut pikkorissarsinnaajunnaarput
Kalaallit Nunaanni Ilagiinni sulisunut pikkorissartitsisarnerit aningaasaliiffigineqartaraluartut, 2011-mut Aningaasanut Inatsisissamit maanna peerneqarsimapput, tamannalu biskopiugallartup, Isak Davidsenip ajuusaarutigaa.
- Nunatsinni ilageeqarnikkut sulisuusut ilinniarteqqinneqartarnerat Inatsisartut atorunnaarsilerpaat, tamannalu sakkortunerpaamik tikkuarusuppara oqarlunga, nunatta oqaluttuarisaanerani aatsaat taama aalajangiinermik kusanaatsigisumik pisoqalerpoq, tusagassiutinut nalunaarummi biskopi ilaatigut taama allappoq.
Aalajangiilinnginnermi Kalaallit Nunaanni Ilagiit tusarniarneqarsimannginnerat pillugu, Isak Davidsenip naalakkersuisoqatigiit uparuarpai.
Ilageeqarnikkut sulisut ilinniarteqqinneqartarnerisa attatiinnarneqarnissaat anguniarlugu, biskopip, Inatsisartuni partiit tamaasa aammalu Naalakkersuisut allagaqarfigisimagaluarpai kinguneqanngitsumilli.
