Nunatsinni Inuunerup Nutaap Oqaluffiani ilagiinut ilaasortat 500-t missaanniittut Brian Windip oqaatigaa.Assi: KNR

Ilagiinni oqaluussisartoq: Akiuussutisserneqarnissarni isumaliutigilluarsiuk

Ilagiit pinsisiortut ilaat coronavirusimut akiuussutissaleqqunngillat. Akiuussutissarmi ataaseq naartuersissutip tartuaneersuanik uumassusilinnik ineriartortitanik akoqarpoq - akiuussutissarli taanna nunatsinni atorneqanngilaq.

Ilagiit naartuersinnermut akerliupput, taakkulu ilaat coronamut akiuussutissat naartuersissutip tartuanik akoqarnerarlugu akiuussusertikkusunngillat.

Maniitsumi Inuunerup Nutaap Oqaluffiani ilagiit pisarnermisut naalagialeruttorput. Naalagianut ilaavoq Brian Wind. Taanna maani ilagiit naalagiartillugit oqaluusseqataasarpoq.

- Naalagiaraangama inuuninni tunngaviga taanna tassaagami ullumikkut guutip oqaasia. Taannalu guutip oqaasianik ajoqersorneqarlunga ilinniartinneqartarpunga.

Nunatsinni Inuunerup Nutaap Oqaluffiani ilagiit 500-t missaanniittut Brian Windip oqaatigaa. Taakkunannga Maniitsumiittut 120-t missaanniillutik. Ilagiit taakkua naartuersittarneq akerleraat.

- Anisuup uumasuaraa arnap mannissaqarfianut ikkunnerani inuk pinngortartoq upperaarput. Taamaattumik Inuunerup Nutaap Oqaluffiani kristumiutut inuk pinngorsimasoq upperivarput. Taamaammat peersitsisarneq inuup inuuneranik tigusinertut isigivarput, Brian Wind KNR-imut oqarpoq.

Coronavirusimullu akiuussutissat naartuersissutip tartuanik akoqarnerarlugu ilagiit ilarpassui akiuussusertikkusunngillat.

- Inuup peersinneqarsimasup sananeqaataata ilaannik akiuussutissat ilaat sanaartoqarneqarmata eqqarsarnartoqartipparput, Brian Wind oqarpoq.

AAMMA ATUARUK Naalakkersuisup sukkanerusumik akiuussusersuinissaq kissaatigigaluaraa

Akiuussutissap akui paasiniarlugit Brian Windip nittartakkatigut misissuinermini paasisimallugu nassuiaavoq.

- Suleqateqarpunga qanigisaqarlunga tamakkuninnga misissuilluartartunik, taakkulu misissugai isummersorninnut aallaavigakka.

Brian Windip coronamut akiuussutissap akui peqqutigalugit apeqquserlugu naalagiani oqaluussisuunermi nalaani oqaluussissutigisimallugu oqaatigaa.

Oqaluussinermini Maniitsumi ilagiinni peqataasut arlallit akiuussutissamik kapitissimasut, kapitissanerlutillu namminneq aalajangissagaat Brian Windip oqaatigaa.

- Ilagiit nalunaarfigaakka nammineq isumaralugu. Akiuussutissap inuup sananeqaataasa ilaanik sanaartorneqartut pissutigalugit eqqarsarnartoqartitisininni ilagiit oqarfigaakka nammineerluinnarlutik nalunngissusertik aallaavigalugu  kapitissanerlutik kapitissannginnerlutilluunniit aalajangissagaat, Brian Wind oqarpoq.

Nakorsaanerup naliliinera 

Coronavirusimut akiuussutissat ilaat naartuersissutip tartuaneersuanik uumassusilinnik ineriartortitanik akoqartoq, nunatsinni nakorsaanerup oqaatigaa. Taakku ilagaat AstraZenecameersoq naartuersissutip tartuaneersuanik uumassusilinnik ineriartortitanik akoqarpoq.

Akiuussutissalli taama akullit nunatsinni atorneqarnikuunngillat.

Taamaattumik naartuersissummik akoqarneraallutik akiuussutissinneqarnissamut apeqqusersuisunut nakorsaaneq erseqqissaateqarpoq.

- Akiuussutissat taakkua Kalaallit Nunaanni atorneqanngillat, Henrik L. Hansen KNR-imut oqarpoq. 

Akiuussutissat pineqartut marluk, tassa AstraZeneca Johnson & Johnsonilu virusimik akoqartut nakorsaanerup oqaatigaa. Taakkuli tassa nunatsinni atorneqarnikuunngillat. 

AstraZeneca chimpanse-adenovirusimik akoqarpoq, taannalu naartuersissummeersup sananeqaataasa minnersaasup aallarnerfianit tulluussarlugu akuneqarsimalluni, taannalu tassa cellekulturimik taaneqartarpoq.

- Laboratoriani atorneqartut ilagaat cellekulturi. Taassuminnga sananermut naartuersissutip tartuata sananeqaataanik akoqarpoq.

Nunatsinni akiuussutissamik kapineqarsinnaasut 18-iniit qummut ukiullit 42.000-it missaaniipput.

Taakkununnga ilaapput akiuussuserneqarsinnaanngikkallartut ukiumut ernisartut 800-t missaaniittut.

AAMMA ATUARUK Savalimmiuni corona tuniluuteriapiloortoq

Kisitsisit qiviaannarlugit amerlagisassaanngillat, taamaattorli assiliaq tamakkiisoq isigigaanni kapitikkusunngitsut kapitissinnaanngitsullu eqimattakkuutaartut nunatsinni coronap akiorsinnaanerulernissaanut sunniuteqarsinnaapput.

Inuunerullu Nutaap Oqaluffiani ilagiit 500-t missaaniipput, taakkua ilaat kapitissimapput.

- Eqimattani akiuussutissamik kapineqarsinnaanngitsut imaluunniit namminneq toqqakkaminnik akiuussuserneqarusunngitsut ataatsimut isigalugit soorunami sunniuteqassaaq, nakorsaaneq oqarpoq.

Nunatsinnilu innuttaasut akiuussutissamik kapitinnissaasa qanoq pingaaruteqartiginera nunatsinni nakorsaanerup erseqqissaqqippaa.

- Kalaallit Nunaat covid-19-eqanngittuaannarnavianngilaq. Naammattunik akiuussusersuisoqareeriarpat ammaqqittussaavoq. Aammalu coronavirusip qaqugorujussuarmut piujuarnissaa naatsorsuutigisariaqarparput. Taamaammat Kalaallit Nunaanni tuniluuttoqaleqqinnissaa qularutiginngivippara. Maannamut takusatsinniit annertunerusumik tuniluuttoqalersinnaanera qularutissaanngilaq. Akiuussutissamillu kapitittut amerlassusaasa naammaginartuunissaat taamaattoqassagaluarpat aalajangiisussaasooq.

Nunatsinni innuttaasut coronamut akiuussusertissinnaasut tamakkiisumik akiuussuserneqareersimasut 15 procentit missaanniipput.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat