Ilageeqarneq ilinniartitaanerlu pingaartippaat

Nunatsinni ungasianiit atuartitsisalernissaq eqqunneqangajalerunarpoq, tamanna paasinarsivoq Inatsisartut Kultureqarnermut, Ilinniartitaanermut, Ilisimatusarnermut aamma Ilageeqarnermut Ataatsimiititaliaa paasisassarsiorluni Danmarkimi Islandimilu sapaatip-akunnera kingulleq angalammat.
Allattoq Najaaraq Egede
februaarip 14-at 2009 13:34

Island ungasianiit atuartitsinermik misilittagaqarluarpoq, taamaammat tappavani misilittakkat Kalaallit Nunaannit misilitagassaqqilluartuusut, ataatsimiititaliap siulittaasua Kristian Jeremiassen oqarpoq.

Islandimi perorsaanermik ilisimatusarfik aqqutigalugu ilinniartut 64 procentiisa perorsaasunngorniatut atuarnertik tamaat ilarujussualuunniit ungasianiit atuartitsineq atorlugu ilinniartarpaat.

Ataatsimiititaliap angalanermini sammisaasa ilagaattaaq ilageeqarneq. Inatsisartut upernaaru ilageeqarneq pillugu peqqussut nutaaq isummerfigissagunaarpaat. Sioqqullugu ilagiit sinniissaasa allallu susassaqartut ataatsimeersuartinnissaat ataatsimiititaliap anguniaqquaa. Ataatsimiititaliap Ilageeqarneq inuiannut pingaaruteqartuusoraa, taamaammallu ingerlalluarnissaa pingaartillugu,

Angalanermi Danmarkimi palasit peqatigiiffiat Den Danske Præsteforening, kalaallit Danmarkimi palasiat aamma Islandip biskoppia naapinneqarput.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq