Ilaat qinigaaqqipput allalli qinigaanngitsoorlutik
Inatsisartunut ippassaq qinersinerup inernera malillugu ilaasortat ilaat qinigaaqqipput, aammali ilaqarput qinigaaqqinngitsoortunik. Taakku ilagaat Inuit Ataqatigiinneersoq Aqqaluk Lynge. Qinigaaqqinngitsoornini pillugu ima oqarpoq:
– Inuit qinersinerat inuillu tamat oqartussaaqataanerat ataqqivara. Aamma qinersisinnut qujavunga. Ataatsimilluunnit ajuusaarutissaqanngilanga. Aqqaluk Lynge oqarpoq.
Aamma oqarpoq, allatut ajornartumik Inuit Ataqatigiit kinguariatsiarnerat pisimasoq, tamannalu ajuusaarutigalugu.
- Kisianni partii nukittulluni ingerlaqqissaaq, allatut ajornaqaaq. Nassuiaavoq.
Inatsisartunut qinigaanngitsoornerit sumik peqquteqarsimasinnaava ?
- Inatsisartunut qinersinerup 2002-mi pisup kingornatigut Naalagaaffiit Peqatigiit nunat inoqqaavisa ataatsimiittartoqatigiivinnut 2004-mi toqqagaavunga, tamatumalu malitsigisaanik Inatsisartuni sulinera ajuusaarnartumik killilertariaqarsimavara. Namminersorneq pillugu Ataatsimiititaliarsuarmi ilaasortaanera annerusumik ingerlassimavara, uanilu qinersinermi oqaluuserisat annikitsualuinnaat tikinneqarmata qinersisartunut suliannut tunngasunik oqariartuuteqarnissannut periarfissaalatsisimallunga. Aqqaluk Lynge nassuiaavoq.
Inuit Issittormiut Kattuffianni ICC-mi sulinini atuakkialerinermillu suliaqarnini nangeqqissanerarpai.
- ICC-mi Naalagaaffiilu Peqatigiinni suliamma saniatigut aamma marlunnik atuakkiorpunga, suliakka naammaqaat. Inuiaqatigiinnut aamma suli tunniusserusuppunga, soorunami. Taamaattumik inuit qujassutissaqartuartariaqarpugut, qanorluunnit inuunitsinni ajorsaraluarutta ingerlariaqqiffissaqartuartaratta. Aamma politikkimik suliaqarnera tamaanga killeqassanngilaq. Aqqaluk Lynge oqarpoq.
Aqqaluk Lynge Inuit Ataqatigiinnik pilersitseqataasimavoq, maannalu naalakkersuisunngortitsiniarluni oqaloqatigiittoqarnerani, partiini siunnersorpaa, toqqammaviusumik isummatik anguniarniaqqullugit, soorlu pissakinnerusunik sullissinerit nunaqarfinnillu illersuinerup erseqqissarneqarnissaat sulissutiginiaqqullugu.
