Ilaat iperaaniarput ilaallu ingerlaannarniarlutik

Folketingimut Demokraatinit qinigassanngortittoq, Niels Thomsen, oqarpoq, Folketingimut ukiaru qinigaassaguni Inatsisartunit sulinngiffeqassalluni.

- Folketingimi suliat annertoorujussuupput. Suliffik nutaajussaaq, pulaniarnerlu piffissamik nukinnillu atuiffiussaaq. Suliat tamaasa artussanagut oqassagaanni pimoorussinerussanngilaq, tamattami inuinnaavugut.

Niels Thomsen folketingimut isissagaluaruni inatsisartuni ilaasortatut tunuarniarpoq.

- Nalilerpara - folketingimut iseruma pimoorussillunga suliara aallartikkusukkakku inatsisartuninngaanniit tunuarallassallunga, oqarpoq.

Parteeqataali, Ane Lone Bagger, Qaasuitsup Kommuniani kommunalbestyrelsemi ilaasortaq, allatut iliorniarpoq. Sillimmasiisarfimmi Tryg-imi atorfeqarpoq.

- Aalajangernikuuvunga kommunalbestyrelsemi ilaasortaanera iperarniarnagu, attatiinnassavara illuatungaanili suliffiga tamakkiisumik iperassallugu, oqarpoq.

Ane Lone Bagger isumaqarpoq, marlunnik qinigaaffeqarluni sulineq ajornarnavianngitsoq, Qaasuitsup Kommuniani kommunalbestyrelsemi ataatsimiinnermi oqarasuaatikkut peqataasinnaasaramik.

Inuit Ataqatigiit Siumullu qineqqusaartitassatik saqqummiutereerpaat. IA-miillu qineqqusaartut, Inatsisartuni kommunalbestyrelseniluunniit qinigaasimanngitsut, Siumumiit qineqqusaartut marluk, Doris Jakobsen aamma Akitsinnguaq Olsen Inatsisartuni maanna ilaasortaapput.

Siumut siulittaasua, Aleqa Hammond, siusinnerusukkut oqarnikuuvoq marlunnik qinigaaffeqarneq ajunngitsoq, pingasuniilli qinigaaffeqarneq akuerineqarsinnaanngitsoq.

Doris Jakobsen, Siumumit Inatsisartuni ilaasortaq, Folketingimut qineqqusaarluni saqqummernermini Radioaviisimut oqarpoq, qinigaassagaluaruni Inatsisartuniiginnassalluni, Kommuneqarfik Sermersuumili kommunalbestyrelsemi ilaasortatut tunuassalluni.

Juliane Henningsen IA-meersoq Folketingimi Inatsisartunilu ataatsikkut aasaq tikillugu ilaasortaavoq.