Ilaasussat utaqqisut: Disko Linemi inuttat suliartunngitsut
Pisoq pillugu Kommune Qeqertalik Disko Linemut sammisumik tusagassiuutinut nalunaaruteqarpoq. Kommunimmi isumaginninnermi sulisui marluk ilaasussaagaluarput, taakkulu kamassimaqalutillu puffaammisimapput.
Kommune Qeqertaliup kinguaattoorneq inuttap aalakoorluni suliartunnginneranik pissuteqarsoraa.
- Takkukkatta arfineq marlup qeqqalersoq, arfineq marluk qimalaaraa paasitinneqarpugut inuttat pingajuat takkutinngimmat utaqqilaartariaqartugut. Kingorna paasitinneqarpugut nalullugu qaqugu aallassasugut inuttat ilaat aalakoormat, Sisi Lange aamma Najannguaq Olsvig Sandgreen tusagassiuutinut nalunaarummi allapput.
Disko Linep angalanissaq 16.30-mut kinguartippaa, tamannalu Kommune Qeqertaliup isumaginninnermi sulisuisa marluk iluarinngilaat.
- Diskoline-p aalakoortoqarnera pissutigalungu angalanissamik kinguaattoortitsimmat piffissaq, eqqorlugu tikissinnaannginnerput qasunarlunilu suliassanik kinguaattoorfiuvoq, Sussi Lange, Najannguaq Olsvig Sandgreenilu allapput.
Disko Line: Ajuusaarpugut
Disko Linep pisortaata, Noëlle Simoudip pisoq ajuusaarutigaa. Taassuma inuttat aalakoorlutit suliartortanngitsut erseqqissaatigaa – inuttaq umiarsuaatileqatigiiffimmut nalunaaruteqarani takunniarnani aalajangersimavoq.
- Tamannali pissutigalugu ilaasussat takkutinnginnerini angalanissaasa allannguuteqarfigineqarneranik nalunaaruteqarsimasinnaasimanngillat – tamannali paasineqarmat taartissamik pissarsiortoqaraluarpoq, iluatsinngimmallu ilaasussat nalunaarfigineqarlutik, Noëlle Simoud oqarpoq.
Pisoqarneralu kinguneqartinneqarumaartoq, umiarsuutileqatigiiffiup neriorsuutigaa.
Pisup kingorna angallatinut inuttat pillugit suleriaatsinik sukaterisimavugut, maannamiit kinguaattoortoqartillugu allannguisoqartilluguluunniit piffissaq siusinnerusoq tamatigut nalunaaruteqarsinnaajumalluta - taamaalillutalu ilaasartugut aallariartoraluartikkusunnagit. Noëlle Simoud oqarpoq.
Ilanngullugulu Disko Line Aasianni, Ilulissani, Qeqertarsuarmi Qaqortumilu najugalinnik inuttassanik pissarsiortuarlutik oqaatigaa.