Ilaasussat 37-t ingerlariaqqissinnaajunnaarput

Tunumi silap ajornera pissutigalugu Kulusummut Kulusummiillu Air Greenlandip timmisartuinut ilaasussat 37-t ingerlariaqqissinnaanngillat.

Air Greenland arlaleriarluni timmisartumik Kulusummukartitsiniartaraluarpoq, Tunumili silarlunnera pissutigalugu timmisartuussinerit tamarmik taamaatiinnarneqartartut, Air Greenland nalunaarpoq.

Silap ajornera kisimi ajornartorsiutigineqanngilaq, Kulusummi mittarfiup sumiissusersiutaa ajoquteqarpoq taamaattumillu timmisartoq Dash 7 aamma qulimiguulik mittarfimmit ikiorserneqaratik Kulusummut minniartussaapput.

Air Greenland nalunaarpoq, timmisartoq imaluunniit qulimiguulik Kulusuup mittarfianut, sila pitsaalluinnartillugu aatsaat missinnaasoq.

Silasiortut silamik ilimasaarutaat naapertorlugu pingasunngorpat sila pitsanngoriartussatut ilimasaarutigineqarpoq, sisamanngorpallu iluarsinerunissaa aamma ilimasaarutigineqarluni.

Taamaattumik pingasunngorpat sisamangorpallu Air Greenlandip Kulusummut Kulusummiillu timmisartuussisinnaanissani neriuutigaa.

Timmisartumik ilaasussat saniatigut, allakkat poortukkallu 1200 kiilut apuunniarneqartussaasut, Air Greenland nalunaarpoq.