SIK: Ilaasortat utaqqeqqittariaqarput
Sulinermik Inuussutissarsiuteqartut Kattuffiata Namminersorlutik Oqartussallu aningaasarsiat pillugit februarip 19-ani isumaqatigiissutaat ilaasortat kaasarfiinik suli oqimaannerulersitsinngilaq.
Aningaasarsialli amerlissutissaat qaammatit marluk pingasulluunniit qaangiuppata aatsaat sulinermik inuussutissarsiortut tigooqqalissavaat.
Taavalu aamma tapit 58-it peerneqartussanngorlutik.
Sulinermik Inuussutissarsiuteqartut Kattuffiata siulittaasuata ilaasortamik kaasarfiisa imaqarnerulernissaat qaqugu pissanersoq oqaatigisinnaanngorpaa.
- Ilimagisinnaavarput qaammatit marluk pingasulluunniit qaangiuppata malugisinnaassagaat, Jess G. Berthelsen KNR-imut oqarpoq.
AAMMA ATUARUK SIK Namminersorlutik Oqartussallu isumaqatigiissummut isumaqatigiipput
SIK-mut ilaasortaq Paamiunersoq utaqqikatappoq. Taassuma aningaasaateqarnerulernissami qaammatit pingasut iluanni pinissaa qularaa.
- Tupinnaqaaq taama sivisutigisumik utaqqeqqissagutta, imaassinnaagami septemberimi suli tingunngikkigut, Hanne Petersen oqarpoq.
Ilaasortat aningaasarsiamik qaffaassutaanut aaqqiissutit tigusassaat, qaammatit pingasut tungaannut sivisussuseqarnissaa SIK-ip ima tunngavilersorpaa.
- Aningaasarsialeriffimmi suliarineqaqqaassagamik, aningaasarsiat qaffaassutaanut kingumoortumik aaqqiissutit aamma misissorneqaqqaassagamik, Jess G. Berthelsen oqarpoq.
AAMMA ATUARUK SIK-p immikkoortortaqarfii utaqqikatapput
Isumaqatigiissutinili assigiinngitsuni 26-ini ikinnerpaamik tapeeqqaat 58-it maannakkut nutarterneqanngitsoorput.
Taakkununnga ilaapput. pikkorissutsimut tapi, portørit sulinerannut tapi ilinniarsimanngitsullu pikkorissutsimut tapiat.
Kikkut tapeqarnerulernissaat illuatungeriit suliariinnarsimagaluarpassuk ilaasortat decemberimi aatsaat aningaasaateqarnerulernissaat SIK-p aarleqqutigaa, taamaammat isumaqatigiinniarnissap tulliani suliarineqassasut illua tungeriit isumaqatigiissutigigaat, siulittaasoq oqarpoq.
Tapit peerneqarneri ilaasortat aningaasarsiaannut qanoq sunniuteqassanersut SIK-ip siulittaasuata Jess G. Berthelsenip oqaatigisinnaannginnerarpaa.