Jess G Berthelsen: Ilaasortat siunissami suliffeqarnissaat robottit qulakkiissavaat
Nunatsinni tunisassiorfiit suliffeqarfissuillu robottinik atuineruleriartorput, taamatullu atortorissaarutinik atuinerulerneq nunatsinni suliffeqarfiit malinnaavigisinnaappassuk, silarsuarmi ineriartornermut aatsaat malinnaasinnaapput. Jess G. Berthelsen Sulisitsisut ilaasortaannut quppersakkami Aurora-mi taama naliliivoq.
Nutaaneq ilikkagaqassapput
Robottilli piffissap affaannaani sulianik naammassinnissinnaappata, taava inuussutissarsiutigalugu sulisartut sumut atussappat?
- Robottit aqunneqartussaapput, SIK-llu ilaasortai tassunga piukkunnarluinnarput. Oqartoqarsinnaavoq robottit suliffissaqartitsinermik qulakkeerisut, Berthelsen Aurora-mut oqarpoq.
AAMMA ATUARUK Sulisussanik amigaateqarneq nunamut tamarmut ajorsarneruvoq
Tamannali imaaliallaannaq pisinnaanngilaq. Suliffinni robottinik atugaqartuni piumasaqaatit anguniarlugit sulisartut piginnaasaminnik qaffassaanissaminnut piareersimasariaqarput.
- Soorunami sulisartut ukioqqortunerit nutaamik atuartinnissaat atortorissaarutinillu digitalinik atuisinnaanissaannut ilinniartinnissaat pisariaqassaaq. Inuusuttut nalorninavianngillat, taakkumi digitalimik atuinermut periarfissanut nalornissanngillat, atortorissaarutinilli nutaaliaasunik atuisinnaanerup ineriartortinneqarneranut malinnaanissaq tamanut pisariaqarpoq, siulittaasoq Sulisitsisut ilaasortaasa quppersagaannut Auroramut oqarpoq.
Soraarsitsinissaq pisortaanerit ilimaginngilaat
Jess G. Berthelsenip siunissami inuussutissarsiornerup iluani suleriusissamik eqqoriaanera, IT-mi siunnersuisartut suliffeqarfiutaata Avanadep ukioq kingulleq misissuineranut naapertuuppoq.
Avanadep misissuinermini suliffeqarfinni digitalimik atuinerusoqalerneratigut soraarsitsiortuinissaq pillugu, nunani soorlu Tysklandimi aamma Englandimi pisortaanerit aalajangiisartullu aperai. Computerworld siorna taama allappoq.
AAMMA ATUARUK Ilisimatooq sulisussaaleqinermut aaqqiissutissarsiorniartoq
Pisortat aqutsisullu aperineqartut 91 procentiisa, robottit atugaanerulernerini it-millu atuinerulernermi, sulisut nutaanik piginnaasaqalersinniarlugit ilinniartinneqassasut naatsorsuutigaat.
Suliffeqarfiilli atortorissaarnerulernikkut angusaqarnerusinnaalissappata unammillernerulersinnaalerlutillu, taava sulisunik soraarsitsiortornissaq ilimagineqanngilaq.
Nunatsinni aalisarnerup, piniarnerup nunalerinerullu iluani 7848-it 2015-ip naanerani sulisuusut, Nunatsinni Naatsorsueqqissaartarfiup kisitsisaataanni takuneqarsinnaavoq.
AAMMA ATUARUK RG-p tunisassiortoqanngikkallarnerani sulisut pikkorissartikkai
