Ilaasortat amerlanerit qinigassanngorteqqissapput

Naalakkersuisut siulittaasuata Inatsisartunut qinersinissaq ippassaq unnukkut nalunaarutigaa. Taamaalilluni Inatsisartunik nutaanik qinersisoqartussanngorpoq, ilaasortaareersullu oqaloqatigisatta amerlanersaat parteertik sinnerlugu qinigassanngorteqqissamaarput.

Siumumi siulittaasoq Hans Enoksen qinigassanngorteqqissanerluni oqaaseqarumanngilaq, partiimi oqaloqatigeeqqaassanerarlutik. Taamaattorli Jonathan Motzfeldt, Ruth Heilmann, Doris Jakobsen, Simon Olsen, Per Rosing-Petersen kiisalu naalakkersuisuusimasut Jørgen Wæver Johansen aamma Jens Napãtok´ qinigassanngorteqqissanerarput. Enos Lyberth paasisavut naapertorlugit nalornivoq.

Atassut sinnerlugu Inatsisartunut qinigaasimasut qinigaaffiullu matuma ingerlanerani Siumumut nuussimasut Otto Jeremiassen aamma Isak Davidsen oqaaseqartinnatik tunuliaquttaminnut tusarniaqqaarumapput, Siumulli sinnerlugu qinigassanngortikkumasinnaanerarlutik.

Inuit Ataqatigiinnit kikkut qinigassanngorteqqissanersut erseqqissumik suli oqaaseqarfigiumaneqanngilaq. Kuupik Kleist oqarpoq, tusarliussaqartinnatik akunnerminni tamanna oqaloqatigiissutigeqqaassallugu. Peqqissutsimulli naalakkersuisoq Asii Chemnitz Narup qinigassanngorteqqissanerarpoq.

Atassutip Inatsisartuni ilaasortaatitai tallimaapput, taakkunanngalu sisamat qinigassanngortissasut, siulittaasuat Finn Karlsen oqarpoq, tallimaalli, tassalu siulittaasorisimasaat Augusta Salling nalornisiginerarpaa, qinigassanngorteqqinnissaali neriuutigalugu.

Demokraatit Inatsisartuni ilaasortaatitaat tallimat qinigassanngortinnissamut piareersimasut, siulittaasuat Per Berthelsen erseqqissaavoq.

Kattusseqatigiit Inatsisartuni ilaasortaatitaat Anthon Frederiksen matumani aamma qulanngilaq.

- Sinerissamit ippassaq ullumilu siarnguttorpassuupput, qinigassanngorteqqeqqullunga. Taamaattumik qinigassanngorteqqissaanga, Anthon Frederiksen erseqqissaavoq.

Siumumit Ole Dorph oqaaseqartinniaraluaratsigu iluatsinngilarput.