Ilaasortat amerlanerit piumavaat
Kommunit 2009-mi januaarip aallaqqaataani kattussuunneqarpata, kommunerujussuassat tamarmik immikkut kommunalbestyrelsianni 17-inik ilaasortaqassapput.
Inatsisissami tamanna siunnersuutaavoq, inatsisartullu akuersinissaat ilimagineqarpoq.
Nuup kommuniatali naliliinera naapertorlugu Kangiata-Kitaata kommunalbestyrelsiani ilaasortat 21-usariaqarput.
- Nuup Kommuneata siunnersuutigaa kommunalbestyrelsemi ilaasortat kommunini innuttaasut amerlassusiat naapertorlugu amerlassuseqartassasut, amerlanerpaamik 21-ullutik, Nuup borgmesteria Agnethe Davidsen taama oqarpoq.
Inatsisissami siunnersuutaavoq kommunini nutaani kommunalbestyrelsimi ilaasortat 17-nik amerlassuseqartassasut. Ilaasortanit 17-sunit kommunioreersunit ilaasortaq ataaseq ilaasortaasinnaassassaaq. Siunnersuut naapertorlugu Kangiata/Kitaata Kommunerujussuassaani taasinerit naapertorlugit naliginnaasumik agguataarinermi ilaasortat 12-iinnaassapput.
- Suliassarpassuit kommunalbestyrelsimi ilaasortanut 21-nut pitsaanerusumik agguataarneqarsinnaassapput. Taamalilluni pissusissamisuussaaq kommunalbestyrelsimi ilaasortanut amerlanernut suliassat agguataarneqartalerpata, borgmester Agnethe Davidsen ippassaq taama oqarpoq.
