Ilaasortat 60-it SIK-mit aninerat paasiuminaatsippaa

Mittarfeqarfinni sulisut akunnermusiallit SIK-mut ilaasortaanerminit tunuarmata, SIK-p siulittaasua isumaqarpoq, SIK-mut ilaasortanut ilinniarsimanngitsunut allanut kusananngitsuliornerusoq.

- Mittarfeqarfinni sulisut ilinniagaqarsimanngitsunut allanut kusanngilluinnaqqissaartumik pissusilersorput, peqqutigalugu isumaqatigiinniarnerit arlallit mittarfeqarfimmiut ilinniarsimanngitsuninngaanniit annertunerusunik tunineqartarsimapput. Maannakkulli soorlulusooq taanna naammaginagu qaammammusiaqalerniarnertik piinnarlugu taamatut SIK-minngaanniit tunuarnerat assorujussuaq uanga kusanaatsutut isigaara, allanut ilinniarsimanngitsunut sanilliullugu.

Ukiuni arfineq pingasuni mittarfeqarfinni sulisut ilinniarsimanngitsut kissaatigisarsimavaat qaammammusiaqalernissaq. Tamannalu pissutaanerulluni Mittarfeqarfimmiut SIK-mit anipput. Tamannalu SIK-p siulittaasuata ima oqaasertalerpaa.

- Isumaqatigiinniarnermi piumasarparujussuit tunniunneqartarput, isumaqatigiinniarnerillu tamaasa piumasat 170-it missaanniittut tunniunneqartarput, taakkulu tamaasa anguneqarsinnaaneq ajorput. Kisianni ilinniarsimanngitsuninngaanniit allanut sanilliullutik aningaasarsiaat qaffasinnerupput taamaammat SIK-minngaannit paasiuminaatsipparput, taanna qaammammusiaqalernissaannaq pillugu SIK-mit animmata. Aammalu nammaqatigiinneq ataatsimut isigalugu, tapersersuinngippallaaqaat. Allaat suliumajunnaartarnerni ullormusiaat ilinniarsimanngitsut allat akiliutaaninngaanniit tunniunneqarput. Allanit akiliunneqarput, taamani suliumajunnaarnerup nalaani, Jess G Berthelsen, SIK-p siulittaasua oqarpoq.