Ilaasortannguutigaluni qinerseqataaneq apeqquserneqarpoq
Siumup partiip allattaanera Mikael Petersen oqaluttuarpoq ippassaq Siumup ilaasortani illoqarfinni pingasuni annerni tassalu Nuummi, Sisimiuni, Ilulissani kiisalu nunaqarfimmi Qaarsuni marloriaatinngortissimagai. Tassa siulittaasumut qinersinermut atatillugu siullermeerutaasumik ilaasortat toqqaannartumik Siumup siulittaasussaanik qinerseqqaarsinnaaneranut atatillugu ilaasortannguutaa qinersisoqartarmat.
Ilaasortannguutaali siulittaasussamik qinersineq malittarisassanik unioqqutitsinerusoq Finn Heilmann isumaqarpoq.
“Partip malittarisassaani erseqqarilluinnartumik allassimasoqaraluartoq siulittaasumut qinersinissamut paragrafimi tassani allassimasoqarmat ukua taasisinnaasut nassiunneqareersimassasut kingusinnerpaamik sapaatip akunneri sisamat sioqqullugu ataatsimeersuartoqarnissaq taamaattumik taamaattumik maanaannakkut torrutiinnarlugu ilaasortanngorsinnarlutik partiip siulittaasussaanik taasisut ilanngunneqarsimappata taanna malittarisassanik unioqqutitsinerummat.”
Partiilli allattaanera malillugu periuseq tamanna unioqqutitsinerunngilaq.
”Nalinginnaasuuvoq partiimi ilaasortat allassimaffiisa nassiunneqartarnerat aamma tamanna pisarpoq ilaasa ukioq naatinnagu nassiuttarpaat uani tassa ihm qularnaarniarneqaannarpoq taakkua pisimassasut kisianni taasisinnaatitaaneq pineqarpoq malittarisassani paragraf 8 tassa taassumalu innersuussutaa paragraf 2 immikkoortut sisamaat tassa taakku tunngavigalugit taasisinnaaneq aaliangersarneqarpoq malittarisassani”
Mikael Petersen oqarpoq ippassaq periuserisimasaq inatsisileritooq Malling siunnersortigalugu ingerlanneqarsimasoq, taamaammallu ajornartorsiuteqannginnerarpaa. Finn Heilmannilli malittarisassanik unioqqutitsisimasutut naliliinini allanngortinnagu oqaatigaa.
