Ilaasortaatitaqarnissaat qulakkeerneqassaaq

Kommuninngortussanut sisamanut atatillugu apriilip arfineq-pingajuanni kommunalbestyrelsinut qinersinermi sumiiffinni qinigaasussat kommuninit ullumikkut 18-ineersuussapput.
februaarip 26-at 2008 08:10

Tassami inatsit immikkut ittoq Inatsisartut akuersissutigereerpaat, taamaalilluni sumiiffiit avinngarusimasuniittut ilaasortaatitaqarnissaat qulakkeerneqassammat. Inatsit immikkut ittuuvoq, qinersinermi inatsit suli nutarterneqanngimmat.

Sumiiffinni avinngarusimasuniittuni qinigaasussat tassaapput partiini imaluunniit kattusseqatigiilluni qinigassanngortittuni qinigaanerpaasuni qinigassanngortittoq taaguunneqarnerpaaq. Qinigaasussaq taanna maannakkut kommunerisamini najugaqartuussaaq.

Qinigassanngortitap maannamut kommunerisaani najugaqarfigisaanilu taaneqarnerit kisimik sumiiffiup sinniisuutitaatut qinigaanermi naatsorsuutigineqassapput.

Sumiiffinni sinniisuutitassat taamatut inissinneqareerpata ilaasortanngortussat sinneri partiinut kattusseqatigiilluniluunniit taaguunneqarnerpaanut agguataarneqassapput taakkua qinigassanngortitaannut taaguunneqarnerpaanut.