Ilaasortaanermut akiliuteqartarneq timersorumannginnermut peqqutaanngilaq

15-iniit ukiullit timersoqatigiiffinni ilaasortaajunnaartarnerat ilaasortaanermut akiliuteqarnermik peqquteqanngilaq, taama oqarput timersoqatigiiffiit marluk klubbini ilaasortaanermut akiliutit peerneqarnissaannik MIPI-mit siunnersuutigineqareersorlu.
Allattoq Najaaraq Egede
decembarip 04-at 2009 14:19

MIPI, Meeqqat Inuusuttullu pillugit Ilisimasaqarfik, isumaqarpoq akiliuteqartarneq inuusuttut timersorunnaartarnerannut peqqutaanerpaasoq. Akeqartitsineq 18-inik ukioqalernermi aatsaat eqqunneqartariaqarsoraat. Taamali oqarneq Tae Kwon-dortartut kattuffianni siulittaasup Kim Rosingip illuatungilerusuppaa, namminnermi ilaasortatik qanorluunniit ukioqaraluartut ilaasortaanerminnut akiliisarmata.

- Ilaasortaanermut akiliut klubbit namminneq aaqqissuuttarpaat. Nalunngisakka malillugit klubbit ilaat ilaasortaminnut neqeroortarput qaammat siulleq akeqassanngitsoq. Klubbit ilaasa qatanngutigiit akiliutaannik annikillisaavigisarpaat.

Kim Rosing aamma oqarpoq ilaasortat pigiinnarnissaannut suliniarneq annerusoq pisariaqartoq.

- Ilinniakkaminnik aallusserusullutik aallartikkaangamik timersorneq annikillisarpaat, tamannalu ilaasortat ikilisarnerannut peqqutaaqataavoq. Aappaatigut sungiusaasut sungiusakkaminnik qanoq aallussinerat apeqqutaavoq, Kim Rosing oqarpoq.

Taamaattumik Kalaallit Nunaanni Timersoqatigiit Kattuffianni pikkorissartitsinerit atorluartariaqarsorai.

- Sungiusaasunik taavalu aqutsisunik pikkorissaanissaq eqqarsaatigaarput, taamaasilluta ilaasortanik paarinnissinnaaneq aqqutissiuussagaluarparput.

Nunatsinni sulorartartut kattuffianni siulittaasoq Mikael Kleist isumaqataavoq. Taanna Kim Rosingitulli oqarpoq ilaasortaanermut akeqartartitsineq taamaatittarnermut peqqutaanngitsoq.

- Inuusuttut ilarpassui ilinniariartorlutik illoqarfinnut allanut aallarartarput, uteraangamilli ilaasortanngoqqittarlutik, Mikael Kleist oqarpoq.

Sulorartartut sinerissami klubbiini siulersuisut namminivik qassinik ukiullit ilaasortaanermut qanoq akiliuteqartassanersut aalajangertarpaat. Ilaasortaaneq sinerissap ilaani ilaasortanut akeqartoq ilaannut akeqarneq ajorpoq. Ilaasortalli amerlassusaannut tamanna apeqqutaanngilaq, Mikael Kleist erseqqissaavoq.

Kalaallit Nunaanni Taekwon-Dortartut Kattuffiat aamma Sulorartartut Kattuffiat nuna tamakkerlugu tamarmik immikkut 1.000-t missaannik ilaasortaqarput.