Ilaasartaatini ilaasut 600-init amerlanerit akerliullutik atsiorput

Sarfaq Ittummut Sarpik Ittummilu ilaasut 663-t Namminersornerullutik Oqartussat Arctic Umiaq Line-p namminersortunngorsarneqarnissaanik aalajangernerannut akerliullutik atsiorrassimapput.

Atsiortorpassuarnut ilaapput takornariat nunatsinni angalaarlutik sinersortaatinut ilaasut.

Sinersortaatini atsiortitsinerit takutinniarpaat siulersuisuunerit imaatigut angalajuaannartoqarsinnaaneranik, sulisullu suliffitik pigiinnarnissaanut sulissuteqarnerannik tapersiillutik. Ilimagineqarpormi Arctic Umiaq Line namminersortunngorsarneqassappat matussasoq.

Atsiornerit ullaamanna Arctic Umiaq Line-p allattoqarfianut nassiunneqarput, taakkulu namminersornerullutik oqartussanut ingerlateqqissavaat.

Sinersortaatini sulisut ippassaq suliaminnik unitsitsillutik ataatsimiipput umiarsuaq nalunaaquttap akunnerinik marlunnik kinguartoortillugu. Ullut pingasut ingerlanerini aappassaa suliaminnik unitsitsipput, naalakkersuisut Arctic Umiaq Line-p namminersortunngorsarneqarneranut akerliullutik.