Ilulissani ilaasartaat kivivoq - ajoqusertoqanngilaq
Ilaasartaat angivallaanngitsoq unnuaq nalunaaqutaq ataatsip missaani Ilulissat eqqaani kivivoq. Takornariat 23-t, angallammilu inuttat pingasut ilaapput. Tamarmik ajunngillat - ajoqusertoqanngilaq.
Allattoq Bibi Nathansen
aggustip 14-at 2016 16:09
Ilaasartaat, Targamik meqqeqartoq, umiarsuup takornartaatsip L'australimit 100 meterinik ungasitsigaluni kiviartulerpoq, ilaasullu tamarmik takornariartaatsip annanniutaanik umiatsianik pullattakkanik takornariartaammut apissinneqarput.
Qaasuitsup Politiivineersoq Sebastian Bech taama KNR-imut paasissutissiivoq.
Taanna naapertorlugu ilaasartaat sumut aporsimananilu aporneqarsimanngilaq, maannakkorpiarli Ilulissani politiit allanik oqaaseqarusinngillat, pisoq pillugu suli paasiniaaneq ingerlanneqarmat.
Avatangiisinut sillimaniarneq isumagineqareersoq Sebastian Bechip nalunaarutigaattaaq.
