Ilaasartaat ikkarlimmat paasissutissiisoqanngilaq
Ikkarlinneq annikikkaluartoq ilaasut 20-it missaanniittut annilaarutigalugulu paasiuminaatsippaat ikkarlinnerup kingorna inuttamit ataatsimiilluunniit nassuiaasoqaranilu tuppallersaasoqanngimmat.
Ilaasut ilaat Bertha Schultz ikkarlinnermi tupassimaqisoq isumaqarpoq taamatut pisoqartillugu ikiuigasuartussat assut amigaataasut:
- Kitsissuarsunnut nal. Marlup missaani tulannata tunoqqullugu ingerlaannarpugut, Kitsissuarsuillu kitaatungaanni ikkarlilluta. Annikikkaluarpoq kisianni assut tupannarpoq, ikiuigasuartussanillu takkuttoqannginnera aamma assut tupalluni pisariaqartinnarpoq, tamannalu amigaataarujussuarpoq, Bertha Schultz radioaviisimut oqaluttuarpoq. Aperaarpullu ikkarlinnerup kingorna inuttat qanoq pisimanersut, ima akivoq:
-Inuttanik takkuttoqanngilaq, tassunga ilaasut isersimaartarfianut, ataasinnguamilluunniit takkuttoqanngilaq. Tamanna assut uanga tupigaara, sumilluunniit oqaatsimik eqqissisaataasinnaasumik oqartoqanngimmat, Aasiaallu tungaanut ingerlaarnerput tamaat, tikikkattaluunniimmi ssuiaasoqanngilaq, Bertha Schultz tupassimaqisoq oqaluttuarpoq.
Ikkarlinnermi pisimasut pillugit Disko Line-mi pisortaq Ole Dorph Radioaviisimut nassuiaavoq ippassaq Najaaraq Ittuup kitsissuarsuit kitaatungaanni ikkarlinnera Søfartsstyrelsemut nalunaarutigisimagitsik. Ilaasartaallu Aasiannut tikimmat aqqartartunit misissorneqarsimasoq, ikkarlinnerlu annikissimangaarmat singarninnguamilluunniit malunnartoqanngimmat, Søfartsstyrelsep Najaaraq Ittuup angalaqqinnissaa akuersissutigisimagaa.
Taamaakkaluartoq ilaasartaammut Najaaraq Ittummi ilaasartutut Bertha Schultz isumaqarpoq ajornerusumik pisoqarnissaa sillimaffiginiarlugu ikiuigasuartussanik sillimasoqartarnissaa pisariaqartoq:
-Sukkulluunnit qanorluunniit pisoqarnissaani sillimasoqarnissaa kissaatiginartorujussuuvoq. Inuimmi uippallerlutik qanoq iliulissangaluarpata naak tuppallersaasussat, Bertha Schultz aperivoq, nangillunilu:
-Ilaasartaatini ilaasartartutut isumaqarpunga toqqissilluta angalassagutta tamanna aaqqissuussaanerusariaqartoq, tassanngaannarlu pisoqartillugu ikiuigasuartussanik pisariaqartitsisoqarnera malunnarmat, Bertha Schultz Radioaviisimut oqaluttuarnermini taama naggasiivoq.
Taama oqarpoq ippassaq Najaaraq Ittummi ikkarleqataasut ilaat Bertha Schultz.
Ilaasartaammi Najaaraq Ittummi naalakkamik inuttalluunniit ilaannik ikkarlittoqarnerani nassuiaasoqarsimannginnera pillugu oqaaseqartitsiniaraluaratta iluatsitsinngilagut.
